Казанның Совет районы йортлары буенча өлкәннәр гомуми милекне тотуга тарифны арттыру турында фикер алыштылар

Бу эшкә урам себерүчеләрне җәлеп итәргә мөмкинлек бирәчәк – хәзер эре идарәче компанияләргә 300 гә якын эшче җитми

Казанның Совет районы администрациясе башлыгы Роман Фәтхетдинов уртак милекне тотуга тарифны арттыру турында фикер алышу өчен йортларның өлкәннәре белән очрашты. Мондый чара урам себерүчеләрнең хезмәт хакын арттырырга һәм яңа хезмәткәрләр җәлеп итәргә мөмкинлек бирәчәк.

Районның эре идарәче компанияләрендә генә дә хәзер 300 гә якын ишегалды себерүче җитми. Проблеманы фатир милекчеләре генә хәл итә ала – аларга торак фондын карап тоту мәсьәләләре буенча карарлар кабул итү хокуклары һәм бурычлары тапшырылган. Мондый мәсьәләләр РФ Торак кодексы нигезендә гомуми җыелышта тавыш бирү юлы белән хәл ителә.

Мисал өчен, Минск урамындагы 59 нчы йортта яшәүчеләр узган ел йорт яны территорияләреннән кар чыгаруга 79 тиен күләмендә тарифны раслаганнар. Уңай нәтиҗәне күреп, яшәүчеләр яңадан карап чыкканнар һәм быел тарифны 1,03 сумга кадәр арттырганнар.

«Иң мөһиме, беренче чиратта халыкны канәгатьләндерә торган нәтиҗә бар», – дип билгеләп үтә Роман Фәтхетдинов үзенең телеграм-каналында.

Совет районында барлыгы 1600 дән артык торак бина салынган. Кыш көне йорт яны территорияләренең чисталыгын 657 урам җыештыручы һәм 88 берәмлек махсус техника тәэмин итәчәк.

Элегрәк хәбәр ителгәнчә, Казан мэры Илсур Метшин урам җыештыручы җитмәгән идарәче компанияләргә, гомуми милекне тоту өчен түләү күләмен яңадан карау турында фикер алышырга дип, фатир милекчеләре белән җыелышлар үткәрергә кушкан иде. Хәзер шәһәрдә 700 дән артык урам җыештыручы җитми, ә алар тариф килешүе белән каралганнан ике тапкырга кимрәк алалар. Торакчылар авырлыклар һәм проблемалар, аларны хәл итү ысуллары турында сөйләп, турыдан-туры һәм ышанычлы әңгәмәгә чыгарга тиеш.

Шулай ук укыгыз

Барлык яңалыклар