«Наше время – Безнең заман» фестиваленә гаризалар бирү вакыты 5 нче октябрьгә кадәр озайтылды

Бүгенге көндә 120 гә якын предприятие заявка биргән

Фото: Марат Мөгыйнов

(Казан шәһәре KZN.RU, 25 нче сентябрь). «Наше время – Безнең заман» XI ачык республика фестивалендә катнашу өчен гаризалар кабул итү 5 нче октябрьгә кадәр озайтылды. Бу хакта матбугат конференциясендә ТР яшьләр эшләре министры Ринат Садыйков хәбәр итте.

Быел чара Әлмәт, Чаллы һәм Казанда өч зона этабын үз эченә ала. Фестивальнең финалы Татарстан башкаласында 20 нче ноябрьдә узачак. Гаризаны теләсә кайсы предприятие коллективы җибәрә һәм катнаша ала. Бүгенге көндә гариза бирү кампаниясендә республиканың 120 гә якын предприятиесе һәм ведомствосы катнашты.

Исегезгә төшерәбез, конкурста катнашу өчен ярты елдан да ким булмаган хезмәт стажы булган җитештерү яки сервис өлкәсе оешмасының штатлы хезмәткәре булырга кирәк.

«Наше время – Безнең заман» фестивале эшләүче яшьләрнең иҗади потенциалын ачуга гына түгел, ә республика һәм ил икътисады үсешенә дә ярдәм итә. «Икътисад предприятиедә, эш урынында гына түгел, иҗади мәйданчыкларда да формалаша», – дип билгеләп үтте Ринат Садыйков.

Фестиваль Татарстанда игълан ителгән Милли мәдәниятләр һәм традицияләр елына багышлана. Җиңүче коллектив 500 мең сум күләмендә гран-при иясе булачак. Гомуми приз фонды 4 млн сум тәшкил итә.

Конкурсның суперфиналы Казанда 17-18 нче ноябрьдә узачак, анда зона турлары лауреатлары һәм җиңүчеләре катнашачак. Фестивальнең гала-концерты 20 нче ноябрьдә узачак.

«Наше время – Безнең заман» фестивале Казанда 2013 елдан башлап ТР Яшьләр эшләре министрлыгы һәм Татарстан Сәнәгать һәм сәүдә министрлыгы тарафыннан ЮНЕСКО эшләре буенча Россия Федерациясе комиссиясе эгидасы астында һәм ТР Рәисе Рөстәм Миңнеханов ярдәме белән үткәрелә.

Шулай ук укыгыз

Барлык яңалыклар