Пассажирларның банк карталарыннан тиешле булмаган күләмдә алынган акчалар тулысынча кире кайтарылачак

Акчаны кире кайтару гариза буенча гамәлгә ашырыла.

(Казан шәһәре KZN.RU, 4-нче июль, Алинә Бережная). 3-нче июльдә банк картасы белән түләгәндә тиешле булмаган сумма алынган җәмәгать транспорты пассажирларына барлык акчалар да ун көн дәвамында тулысынча кире кайтарылачак. Бу хакта «Транспорт картасы» ачык акционерлык җәмгыяте генераль директоры урынбасары Рамил Якупов хәбәр итте.

«Мондый хәлнең килеп чыгуы өчен гафу үтенәбез. Барлык проблемалар да хәл ителәчәк. Без инде банклар белән сөйләштек, акчаны кире кайтару 6-10 көн дәвамында хәл ителәчәк. Кеше факторы аркасында хата килеп чыкты», - диде Р.Якупов.

Юл йөрү өчен түләү проблемасы белән очрашкан һәркемгә «Транспорт картасы» ачык акционерлык җәмгыятенең түбәндәге адреслар буенча урнашкан халык белән эшләү пунктларында акчаларны кире кайтару турында гариза язарга кирәк: Некрасов ур., 24 һәм Чуйков ур., 1а. Дүшәмбе-җомга көннәрендә пунктлар 8.30 сәгатьтән 19.00 сәгатькә кадәр төшке ашсыз, шимбә һәм якшәмбе 8.30 сәгатьтән 15.00 сәгатькә кадәр эшли. Шулай ук 8 (843) 262-80-80 номеры буенча кайнар линиягә шалтыратырга мөмкин.

Исегезгә төшерәбез, 1-нче июльдән Казанда транспортның барлык төрләрендә дә йөрү өчен банк картасы белән түләү функциясе кертелде. Казан җәмәгать транспортында көн саен пассажирлар агымы якынча 600 мең кешене тәшкил итә, аларның 36 меңе карталар белән түли.

Шулай ук укыгыз

Барлык яңалыклар