Кыргызстан, Казахстан, Италия, Белоруссиядән сәламәтлек мөмкинлекләре чикләнгән спортчылар Казанга «Победим вместе» турнирына киләчәк

Ярышлар 4 нче октябрьдән 9 нчы октябрьгә кадәр «Буревестник» йөзү бассейнында узачак

Фото: Марат Мөгыйнов

(Казан шәһәре KZN.RU, 2 нче октябрь, Зилә Гайфи). Бу атнада Казанда Даун синдромы булган кешеләр өчен «Победим вместе» бөтенроссия йөзү турниры старт ала. Анда беренче тапкыр Россиянең 38 төбәгеннән һәм дүрт илдән – Кыргызстан, Казахстан, Италия, Белоруссиядән – 200 дән артык спортчы катнашачак. Бу хакта эшлекле дүшәмбедә Казан Башкарма комитеты җитәкчесе урынбасары Гүзәл Сәгыйтова хәбәр итте.

ТР башкаласы бу ярышларны кабул иткән беренче шәһәр булды һәм аны даими нигездә уздыру теләген белдерде.

«Турнир мөһим социаль әһәмияткә ия, һәм безнең өчен бик җаваплы чара булып тора, анда спортчылар һәм аларның әти-әниләре җылы, дустанә шартларда очрашалар, ә ярышлар бәйрәм форматында уза. Монда җиңелүчеләр юк. Стартка чыккан һәркем җиңүче булып тора», - диде Гүзәл Сәгыйтова.

Ярышлар 4 нче октябрьдән 9 нчы октябрьгә кадәр «Буревестник» йөзү бассейнында узачак. Тантаналы ачылыштан соң дүрт ярыш көне, шулай ук спортчыларның әти-әниләре белән түгәрәк өстәл планлаштырылган. Уеннарда катнашучылар өчен зур мәдәни программа әзерлиләр – спортчылар Казанда зооботаника бакчасында була һәм цирк тамашаларын карый алачак.

Турнир иҗади кичә белән тәмамланачак, анда балалар үз талантларын күрсәтәчәк һәм махсус әзерләнгән номерлар белән чыгыш ясаячак.