Коткаручылар Казандагы ачык сулыкларда бәкегә чуму урыннарын тикшерәчәк

Бәкегә чумарга ничек әзерләнергә һәм кышкы чыныгуга нинди каршылык була алуы турында белешмәлектә укыгыз.

Фото: Денис Гордийко

(Казан шәһәре KZN.RU, 17 нче гыйнвар). 19 нчы гыйнварда, Хач ману көнендә, диндарлар традиция буенча купельга чумачаклар. Моның өчен Казанда 4 су коену урыны әзерләнә. Ачык сулыкларда булган купельләрне Татарстанның гадәттән тыш хәлләр министрлыгы белгечләре караячак, дип хәбәр итә ведомствоның матбугат хезмәте. Бәкегә чумуга ничек әзерләнергә һәм кышкы чыныгуга нинди каршылыклар була алуы турында белешмәлектә укыгыз.

ТР Сәламәтлек саклау министрлыгында җиткерүләренчә, купельгә сәламәт кешеләргә генә чумарга кирәк. Әгәр кешенең нинди дә булса авыруы бар икән, коенудан тыелырга кирәк. Традицияне үтәргә теләгәндә, башта терапевт белән киңәшләшергә кирәк. Ул барлык киңәшләрен әйтәчәк һәм нәтиҗә бирәчәк.

Коенуга каршы күрсәткечләр түбәндәгеләрдән гыйбарәт: йөрәк-кан тамырлары авырулары, шул исәптән гипертония, шулай ук нерв системасы бозылулары, йогышлы авырулар, хатын-кызларның ялкынсыну авырулары, хроник авыруларның көчәюе, шикәр диабеты, симерү, сидек-җенес системасы авырулары. Шулай ук ТР Сәламәтлек саклау министрлыгы йөкле, 7 яшькә кадәрге балаларга һәм 65 яшьтән өлкәнрәк кешеләргә бәкегә чумудан тыелырга киңәш итә.

Үзеңә зыян китермәс өчен, берничә кагыйдәне үтәргә кирәк. Купельдә коенганчы кан басымын үлчәргә кирәк: әгәр күрсәткеч нормадан аерыла икән, бозлы суга чумарга ярамый. Алкоголь яки башка исерткеч матдәләр эчәргә ярамый – хәтта кечкенә доза да йөрәккә авырлык китерә. Суга чумганчы, җылынырга – сикерергә, күп хәрәкәтләнергә кирәк. Бу кан әйләнешен көчәйтәчәк һәм тәнне җылытачак. Организмның энергия запасы булсын өчен, суга чумганчы ким дигәндә бер сәгать кала яхшылап ашарга кирәк. Шул ук вакытта майлы ризыклардан баш тартырга кирәк.

Суга чумарга чират җиткәч, артык озак уйлап торырга ярамый. Алдан сулышны туктатып торырга мөмкин. Суда 15-20 секунд булу да җитә, бигрәк тә бу беренче тәҗрибә булса. Судан чыккач, тизрәк сөртенергә, җылы итеп киенергә һәм җылы чәй, шулпа эчәргә кирәк. Кан тамырларына зыян китермәс өчен, тәнне яхшылап сөртергә кирәк.

Әгәр дә кеше тулысынча сәламәт булса, дөрес коенса, салкын тидерү куркынычы минималь. Моннан тыш, табиблар бәкедә коенырга ярты ел алдан – җәйдән үк әзерләнә башларга киңәш итә.

Татарстан Гадәттән тыш хәлләр министрлыгында да бәкегә чуму кагыйдәләрен искә төшерделәр. Аерым алганда, моны коткаручылар һәм медицина хезмәткәрләре булмаган урыннарда эшләргә киңәш ителми, боздан суга чумарга һәм өч кешедән артык төркем белән коенырга ярамый. Бәкегә уңайлы һәм тайгак булмаган аяк киемендә якын килергә кирәк.

Исегезгә төшерәбез, Казанда суга чумдырылу йолалары өчен 4 купель җиһазландырылачак. Су коену урыннарында яшәүчеләрнең иминлеге өчен полиция һәм ашыгыч ярдәм бригадасы хезмәткәрләре, шулай ук ашыгыч ярдәм күрсәтү өчен кирәкле җиһазлары булган коткаручылар кизү торачак.

Казан епархиясе храмнарында хач ману алдыннан бәйрәм гыйбадәтләре узачак.

Шулай ук укыгыз

Барлык яңалыклар