Казанның Совет районы иң яхшы Яңа ел бизәлеше конкурсында җиңүче булды

Төрле номинацияләрдә беренче урын өчен 42 муниципаль район һәм ике шәһәр округы көрәште

Бүген ТР Хөкүмәте йортында узган республика киңәшмәсендә иң яхшы Яңа ел чарасына һәм бәйрәм бизәлешенә XII республика конкурсына йомгак ясалды. Конкурс комиссиясе Казанның Совет районын бер номинациядә җиңүче дип тапты.

Җиңүчеләргә бүләкләрне Татарстан рәисе Рөстәм Миңнеханов тапшырды.

Конкурста 42 муниципаль район һәм ике шәһәр округы катнашты. Проект 9 номинацияне һәм «Ә безнең ишегалдында» дип аталган бер махсус призны күздә тоткан. 23 белгечтән торган комиссия – дәүләт органнары һәм җәмәгатьчелек вәкилләре – барлыгы 94 чараны бәяләде.

Нәтиҗәдә 14 җиңүче һәм 44 приз алучы билгеләнде. Совет районын үзәк Яңа ел чыршысын иң яхшы бизәү һәм Казан районнарында яңа ел чараларын уздыру өчен бүләкләделәр.

Рөстәм Миңнеханов билгеләп үткәнчә, конкурста катнашу – һәр муниципалитет һәм предприятиенең бурычы. Аның сүзләренчә, яңа ел бизәлешенә конкурс республика халкында һәм кунакларында бәйрәм рухы тудыра. Кышкы каникуллар бөтен гаиләләр, мәктәп укучылары һәм яшьләр өчен иң дәвамлысы булып тора, дип билгеләп үтте рәис.

Төбәк башлыгы шулай ук конкурсны әзерләү һәм аңа нәтиҗәләр ясау эшен системалаштырырга кушты, бердәм стандартлар эшләргә тәкъдим итте, дип хәбәр итә ТР Рәисе матбугат хезмәте.

Исегезгә төшерәбез, ТР башкаласында Яңа ел каникулларында 106 бушлай чара уздырылган, алар 28 җәмәгать киңлегендә җәелдерелгән. Шәһәр халкы һәм кунаклары бәйрәм чараларында 440 мең тапкыр булганнар.

Шулай ук укыгыз

Барлык яңалыклар