Казан укучылары җәйге каникуллар вакытында эшкә урнаша алалар

Халык мәшгульлеге үзәге «сорау – җавап» форматында балигъ булмаганнарны эшкә урнаштыру кагыйдәләре турында искә төшерә.

Фото: Денис Гордийко

(Казан шәһәре KZN.RU, 21-нчы май). Җәйге каникуллар башлану белән Казан укучыларының вакытлыча эшкә урнашу мөмкинлеге барлыкка килә. Халык мәшгульлеге үзәге балигъ булмаганнарны эшкә урнаштыру кагыйдәләре турында искә төшерә.

Балигъ булмаганнарны эшкә алганда нинди кагыйдәләр үтәлергә тиеш?

РФ Хезмәт кодексының 63-нче маддәсе нигезендә, 14 яшьтән кечерәк балаларга кинода, театрда эшләргә, ата-аналарның берсе һәм опека органы ризалыгы белән концертларда яки цирк тамашаларында катнашырга рөхсәт ителә.

Эшкә кергәндә балигъ булмаган гражданнарга сынау срогын билгеләргә ярамый.

18 яшькә кадәрге затлар эшкә беренчел мәҗбүри медицина тикшерүеннән соң гына кабул ителә, ул эш бирүче акчалары исәбеннән уздырыла.

Балигъ булмаганнар өчен эш вакытының озынлыгы нинди?

16 яшькә кадәрге хезмәткәрләр өчен эш вакыты атнасына 24 сәгатьтән дә артык булмаска тиеш, 16 яшьтән 18 яшькә кадәрге хезмәткәрләр өчен – атнага 35 сәгатьтән дә артык түгел.

Көн саен эшләү (смена) озынлыгы 15 яшьтән 16 яшькә кадәрге балалар өчен 5 сәгатьтән һәм 16 яшьтән 18 яшькә кадәрге яшүсмерләр өчен 7 сәгатьтән арта алмый.

Балигъ булмаганнар өчен эштә чикләүләр бармы?

Балигъ булмаган хезмәткәрләрне командировкаларга җибәрү, гадәттән тыш эшкә җәлеп итү, төнлә эшләү, ял көннәрендә һәм эшләми торган бәйрәм көннәрендә җәлеп итү тыела.

Әмма күрсәтелгән тыю массакүләм мәгълүмат чараларында, кинематография оешмаларында, теле- һәм видеотөшерү коллективларында, театрларда, театр һәм концерт оешмаларында, циркларда, шулай ук балигъ булмаган спортчыларга караган иҗади хезмәткәрләргә кагылмый.

Вакансияләр турында кайда белергә була?

Туры килә торган эш сайлап алу өчен халыкны эш белән тәэмин итү үзәгенә мөрәҗәгать итәргә мөмкин. Шулай ук вакансияне «Россиядә эш» порталында сайларга мөмкин.

Шулай ук укыгыз

Барлык яңалыклар