Бүген «Черек күл» паркында удмурт мәдәнияте бәйрәме узачак

«Бабушки из Бураново» коллективы концертның хедлайнеры булачак.

Фото: Денис Гордийко

(Казан шәһәре KZN.RU, 28 нче июль). Бүген, 28 нче июльдә, Казанның «Черек күл» паркында «Тормыш агачы» проекты кысаларында удмурт мәдәнияте бәйрәме узачак. «Бабушки из Бураново» коллективы концертның хедлайнеры булачак.

18:00 сәгатьтә парк үзәгендә, перголалар янында, традицион костюмнар һәм декоратив-гамәли сәнгать эшләнмәләре белән мәйданчыклар эшли башлаячак. Теләүчеләр удмурт уеннарын уйный, халык мәкальләрен өйрәнә, удмурт скрипкасында (кубыз) уйнарга өйрәнә алачак һәм удмурт ризыкларының рецептларын беләчәк. Монда ук удмурт телендә китаплар тәкъдим ителәчәк.

Бәйрәм кунаклары удмурт милли бизәге төшерелгән истәлекле кечкенә әләм, удмурт күкрәк бизәге – монисто, бәхет китерә торган тукылган беләзек («суйпоскес»), каен тузыннан эшләнмә («куанэм»), Удмуртиянең символы Италмас (алтын туй чәчәге) рәвешендә түштамгалар ясауда, шулай ук «Турын-куар» үләннәр белән туку буенча мастер-класста катнаша алачак.

Бәйрәм программасында Казаннан, Татарстанның Кукмара һәм Балтач районнарыннан килгән фольклор коллективлары, шулай ук җырлар авторы һәм башкаручысы Светлана Зянколованың чыгышлары да бар.

18:30 сәгатьтә парк амфитеатрында традицион удмурт биюе тыпыртон буенча мастер-класс башланачак, ә 19:00 сәгатьтә Zakaria фолк-төркеме чыгышы булачак, дип хәбәр иттеләр Казан Башкарма комитетының Телләр культурасы өлкәсендә милли сәясәтне гамәлгә ашыру бүлегендә.

19:10 сәгатьтә бәйрәм хедлайнерлары – «Бабушки из Бураново» удмурт коллективы концерты башлана, белгәнебезчә, алар 2012 елда «Евровидение» халыкара конкурсында Россияне тәкъдим иттеләр һәм икенче урынны яуладылар.

Кичә электрон музыкант Dark-Ray тарафыннан куелачак удмурт көйләренә диджей-сет белән тәмамланачак, музыкант пульт артына 19:40 сәгатьтә басачак.

Исегезгә төшерәбез, «Тормыш агачы» агарту проекты шәһәр халкын фин-угыр һәм төрки халыкларның мәдәнияте, аларның тарихы һәм туган телләре белән таныштыра. Мари мәдәниятенә багышланган беренче чара 14 нче июльдә узды. Казанлылар «Черек күл» паркында халкыбызның гореф-гадәтләрен өйрәнделәр, тывырдык биергә, тумырда һәм шувырда уйнарга өйрәнделәр һәм шептун-курчаклар ясадылар. 11 нче августка – чуаш мәдәнияте бәйрәме, ә 25 нче августка мордва мәдәнияте бәйрәме планлаштырылган.

Проект Россия халыкларының мәдәни мирас елы кысаларында оештырылды. Аның төп максаты – Идел буе халыкларының туган телләрен, аларның традицион мәдәниятен саклап калу һәм популярлаштыру. Ул Казан Мэриясе һәм Халыклар ассамблеясе тарафыннан ТР Президенты каршындагы татар телен һәм республикада яшәүче халыкларның туган телләрен саклау, үстерү мәсьәләләре комиссиясе ярдәмендә тормышка ашырыла.

Шулай ук укыгыз

Барлык яңалыклар