Бүген «Әкият» курчак театры янында джаз кичәсе, призлар уйнату һәм картиналар күргәзмәсе узачак

Казанда «Мәдәни чәршәмбе» проекты дәвам итә.

Фото: Денис Гордийко

(Казан шәһәре KZN.RU, 15 нче июнь). Бүген «Әкият» курчак театры янында «Мәдәни чәршәмбе» проекты кысаларында джаз музыкасы кичәсе узачак. Бәйрәм кунаклары өчен концерт программасы, күргәзмә һәм призлар уйнату әзерләнгән.

Бүгенге чара джаз тарихына багышланган. Шәһәр халкының күңелен дирижер Александр Козлов җитәкчелегендәге балалар симфоник джаз оркестры ачачак. Музыкантлар танылган композицияләр башкарачак. Иҗади номерлар белән шулай ук Татарстан Республикасының атказанган артисты Лилия Чугунова һәм Bridge тынлы уен кораллары ансамбле чыгыш ясаячак.

Шәһәрлеләр арасында призлар уйнатылачак, шул исәптән – халык артисты Олег Газмановның автографы. Шулай ук ачык һавадагы бәйрәмдә Казанның Балалар сәнгать мәктәпләре укучыларының эшләреннән күргәзмә оештырылачак.

Чара 18:00 сәгатьтә башлана, дип хәбәр итә Казан Башкарма комитетының Мәдәният идарәсе.

Исегезгә төшерәбез, «Мәдәни чәршәмбе» проекты Татарстан башкаласында 2017 елда старт алды. Бу җәйдә чаралар «Черек күл» паркында һәм «Әкият» курчак театры янында узачак. Шәһәр халкы һәм кунаклары өчен музыкаль кичәләр, лекцияләр, мастер-класслар, шәһәр коллективлары һәм чакырылган спикерлар катнашында фестивальләр оештырыла.

Июнь аенда джаз һәм рок-кичәләр узачак, июль аенда – гаилә һәм бию фестивальләре, ә август аенда джинс мәдәнияте фестивале, шулай ук Казан сәнгате белгечләре һәм тарихчыларыннан лекцияләр циклы оештырылачак.

Шулай ук укыгыз

Барлык яңалыклар