Бүген казанлылар Арина Кияшкога «Голос. Дети» тапшыруында финалга чыгарга ярдәм итә ала

Республика данын яклап финалга чыгучылар арасында Татарстаннан берүзе калган кызга туры эфир вакытында смс аша тавыш бирергә кирәк

Фото Арина Кияшконың шәхси архивыннан алынды

Бүген Татарстан Республикасы башкаласында яшәүчеләр Арина Кияшкога «Голос. Дети» тапшыруында өстәмә этап буенча финалга чыгарга ярдәм итә ала. Тавыш бирү нәтиҗәсендә аның вокал бәйгесендә җиңүче булу мөмкинлеге бар.

Әлеге шоуда опера җырчысы Аида Гарифуллина Арина Кияшконың остазы итеп билгеләнде. Катнашучы «Поединки» этабында Гарифуллина командасындагы өчлекнең берсендә чыгыш ясаган. Арина Анна Царева һәм Арсений Бардин белән бергә La La La (Naughty Boy & Sam Smith) җырын башкарган. Алар арасында иң яхшысы дип Түбән Кама укучысы танылган.

Татарстаннан Гарифуллинаның икенче укучысы – 12 яшьлек Казан кызы Милина Хәйруллина бу этапны үтә алмаган һәм проекттан төшеп калган.

Алдагы сынау – «Песня на вылет» этабын Арина Кияшко үтә алмаган. Шуңа да карамастан, яшь җырчының финалга чыгу мөмкинлеге бар. «Поединки» өлешендә төшеп калган 9 катнашучы өчен проектның йомгаклау этабында өч буш урын ачык, дип игълан итте оештыручылар. Якташыбыз өстәмә чыгарылышта әлеге урын өчен көрәшәчәк, бүгенге чыгарылышта җиңүчеләрне телевизор караучылар сайлаячак.

Казан халкы «Беренче канал»ның туры эфирында смс аша Арина Кияшкога тавыш биреп, яшь җырчының киләчәге өчен үз өлешен кертә ала. Тамаша 21:45 сәгатьтә башлана.

Шулай ук укыгыз

Барлык яңалыклар