Казанның беренче үзмәшгульләре азык-төлек җыелмалары алды

Бүген якынча 50-60 җыелманы тарату планлаштырыла.

(Казан шәһәре KZN.RU, 4-нче май, Ксения Швецова). Бүген «Сәйдәш» мәдәни үзәгендә кризистан аеруча зыян күргән өлкәләрдә эшләүче Совет районының үзмәшгульләренә һәм шәхси эшмәкәрләренә азык-төлек җыелмалары тарата башладылар. Барлыгы 845 район кешесе ярдәм алачак, азык-төлек җыелмаларын алу өчен гаризалар кабул итү дәвам итә.

Азык-төлек җыелмаларын берничә көн дәвамында өләшәчәкләр. Бүген якынча 50-60 җыелманы тарату планлаштырыла.

Бүгенге көндә Совет районында яшәүче үзмәшгульләрдән һәм эшмәкәрләрдән 200-гә якын гариза кабул ителде, дип хәбәр итә район хакимиятенең матбугат хезмәте.

Исегезгә төшерәбез, республиканың мохтаҗ кешеләренә ярдәм Татарстан Президенты Рөстәм Миңнеханов карары буенча күрсәтелә. Азык-төлек җыелмалары бүгенге вәгыятьтә зыян күргән һәм башка чыганаклардан ярдәм алмаган гаиләләргә ике ай дәвамында ике атнага бер тапкыр биреләчәк. Алар арасында ата-аналары кризистан зыян күргән өлкәләрдә эшләүче үзмәшгульләр яки шәхси эшмәкәрләр булган балалы гаиләләр бар. Казанда барлыгы 14 мең 967 гаилә ярдәм алачак.

Кризистан зыян күргән өлкәләрдә эшләүче үзмәшгульләр һәм шәхси эшмәкәрләрдән район администрацияләренә түбәндәге телефоннар буенча кайнар линияләргә мөрәҗәгать итүләрен сорыйлар:

+7(843)519-34-47 - Авиатөзелеш һәм Яңа Савин районнары;

+7(843)264-31-41, 264-30-86 - Вахитов һәм Идел буе районнары;

+7(843)557-76-10 - Киров һәм Мәскәү районнары;

+7(843)272-01-05, 272-35-03 - Совет районы.

Кайнар линия 9.00 сәгатьтән 18.00 сәгатькә кадәр эшли.