Ел башыннан Казанда янгын чыгу очраклары элеккегә караганда 2,1%ка кимрәк теркәлгән

11 ай эчендә 4856 йортта 17 мең 880 автоном янгын хәбәрчесе урнаштырылган.

Ел башыннан Казанда 1292 янгын очрагы теркәлгән. Җәйнең эссе һәм коры булуына карамастан, бу, узган елның шул ук чоры белән чагыштырганда, 2,1%-ка кимрәк. Әмма янгыннарда, 2020 елның шул ук чоры белән чагыштырганда, 4 кешегә күбрәк һәлак булган. Янгыннар аркасында барлыгы 28 кеше үлгән, 55 кеше тән җәрәхәте алган – бу, узган ел белән чагыштырганда, 3 кешегә кимрәк.

Торак секторда килеп чыккан 980 янгынның сәбәбе – ут белән саксыз эш итү, нәтиҗәдә 21 кеше һәлак булган, 237 янгын электр җиһазларын һәм электр көнкүреш приборларын урнаштыру һәм эксплуатацияләү кагыйдәләрен бозу аркасында килеп чыккан, анда 7 кеше һәлак булган. Һәлак булучылар белән килеп чыккан очраклар тәүлекнең кичке һәм төнге вакытына – 20:00 сәгатьтән 4:00 сәгатькә кадәр туры килә. 12 һәлак булучы исерек хәлдә булган, 8 кеше өлкән яшьтәге кешеләр, һәлак булучылар арасында бер бала да бар.

Янгын чыгу сәбәпләрен булдырмау өчен дәүләтнең янгынга каршы хезмәте, полиция хезмәткәрләре, идарәче компанияләр, социаль яклау бүлекләре хезмәткәрләре, Казан Башкарма комитетының район администрацияләре хезмәткәрләреннән торган профилактик төркемнәр тарафыннан ел башыннан бирле 1817 очрашу уздырылган, ул 22 мең 15 кешене колачлаган, шулай ук алар 8033 күп фатирлы торак йорт, 33 меңнән артык шәхси йорт, 4390 күп балалы гаилә, 5,5 меңгә якын ялгыз яшәүче гражданнар, 1933 имин булмаган гражданнар яши торган урыннарга чыккан.

90 мең 179 листовка, көнкүрештә янгын куркынычсызлыгы һәм үз-үзеңне тоту чаралары турында белешмә таратылган, бу узган ел белән чагыштырганда 7 тапкырга күбрәк. Янгын куркынычсызлыгы чаралары буенча инструктажны колачлау 7,5 тапкырга диярлек арткан – барлыгы аны 70 мең 385 кеше узган.

Ел башыннан бирле 4856 йорт биләмәсендә 17 мең 880 автоном янгын хәбәрчесе урнаштырылган.

Балалар куркынычсызлыгы айлыгы кысаларында агымдагы елның сентябрь аенда белем бирү учреждениеләрендә укучыларга (тәрбияләнүчеләргә) һәм хезмәткәрләргә «Барыгызга да игътибар!» сигналы буенча эшләргә тиешле гамәлләр өйрәтелгән,моннан тыш, биналардан практик эвакуацияләү буенча өйрәнүләр уздырылган, беренчел янгын сүндерү чараларын куллану кагыйдәләре буенча гамәлдә күрсәтүләр оештырылган, мәктәпләрдә ТР Гадәттән тыш хәлләр министрлыгы Дәүләт янгынга каршы хезмәте һәм полиция хезмәткәрләрен җәлеп итеп, тормыш иминлеге нигезләре ачык дәресләре үткәрелгән, районнарның янгын-коткару бүлекчәләренә бару оештырылган.

Шәһәр оешмаларында күзәтчелек эшчәнлеге һәм профилактика эшләре бүлеге хезмәткәрләре тарафыннан янгын куркынычсызлыгы таләпләрен үтәүгә 546 планлы тикшерү үткәрелгән, аларның нәтиҗәләре буенча янгын куркынычсызлыгы буенча кимчелекләрне бетерүгә 417 күрсәтмә бирелгән, 398 вазыйфаи зат һәм 26 юридик зат административ җаваплылыкка тартылган.

Элек бирелгән күрсәтмәләрнең үтәлешен тикшергән вакытта янгын куркынычсызлыгы өлкәсендә 230 юк ителергә тиеш булып та бетерелмәгән тәртип бозу ачыкланган, шуңа бәйле 261 вазыйфаи зат һәм 28 юридик зат административ җаваплылыкка тартылган.

Шулай ук укыгыз

Барлык яңалыклар