Ел башыннан Казанда су басу турында 70 мөрәҗәгать теркәлгән

Бөек Ватан сугышы ветераны һәм аның 1 төркем инвалид кызына күченүдә ярдәм күрсәтелгән.

Фото: Денис Гордийко

(Казан шәһәре KZN.RU, 27 нче март, Диана Жиленкова). Ел башыннан Казанның бердәм кизү-диспетчерлык хезмәтенә су басу турында 70 мөрәҗәгать килгән. Шәһәр районнарында яшәүчеләрнең мөрәҗәгатьләренә оператив рәвештә җавап бирәләр, аерым алганда, Бөек Ватан сугышы ветеранына һәм аның 1 төркем инвалид кызына күченүдә ярдәм күрсәтелде. Тулаем алганда, су басу ситуациясе контрольдә тотыла, бүгеннән тәүлек әйләнәсе кизү торыла, дип хәбәр итте Башкарма комитетта эшлекле дүшәмбедә Гражданнарны яклау идарәсе башлыгы Фердинант Тимурханов.

«Су басу чорындагы гамәлләр инде күптән эшләнгән, моның белән үзеңне тынычландырырга ярамый һәм һәрвакыт әзер булырга кирәк, – дип ассызыклады Башкарма комитет җитәкчесе Рөстәм Гафаров. – Мин районнарга мөрәҗәгать итәм: килеп туган проблемаларга оператив рәвештә җавап бирүебез халык өчен мөһим булып тора. Килешенгәнчә, эш әлегә бара. Ләкин профилактика өчен дә мөмкин кадәр күбрәк эшләргә кирәк».

Ф.Тимурханов сүзләренчә, 25 нче һәм 26 нчы мартта кече елгаларда су дәрәҗәсе кискен күтәрелгән. Идел буе районының Салмачы поселогында һәм Киров районының Игумново поселогындагы Проезжая урамында җитди су басу килеп чыккан. Мәсәлән, Бөек Ватан сугышы ветеранын һәм аның 1 төркем инвалид булган кызын туганнарына күчерүдә ярдәм күрсәтелгән. Аларның өендә белгечләр суны суыртып, агынты суларны чыгару өчен яңгыр челтәрләрен чистарта башладылар, дип аңлатты Гражданнарны яклау идарәсе башлыгы.

«Мирный, Борисково, Әмәт, Петровский, Калуга, Салмачы, Первомайский торак массивларында 80 торбаны ачу, шулай ук 3 меңнән артык яңгыр кабул итү җайланмаларын кардан һәм боздан чистарту буенча эшләр 100% ка тәмамланган», – дип хәбәр итте Ф.Тимурханов. Ул, күрелгән чараларга карамастан, кайбер мәсьәләләр әле дә хәл ителеп бетмәде, дип өстәде. Мәсәлән, Константиновка поселогында, төзелеш базары янында, Вертлевка елгасы агачлар белән капланган. «Рөстәм Гыйльфанович, без тиешле йөкләмә бирүегезне сорыйбыз, югыйсә киләсе елга Вертлевка елгасы Казан картасыннан юкка чыгачак», – дип мөрәҗәгать итте ул Башкарма комитет җитәкчесенә.

Р.Гафаров кирәк булганда ел саен язгы сулар белән тула торган участоклар буенча проектлар эшләргә кушты. «Аңлашыла ки, кешеләр җир кишәрлекләре түбән җирләрдә, су баса торган урыннарда сатып алганнар. Әмма хәзер алар безнең кешеләр, алар төзеделәр, формалаштылар, безгә узган ел Киров районындагы кебек техник карарлар кабул итәргә кирәк, – анда хәзер су басмый. Проектлар кирәк булган урында, киләсе елга эшләр исемлегенә кертү өчен, проектлар белән эшлибез. Оператив чаралар кирәк булган урында – оператив чаралар күрәбез», – дип нәтиҗә ясады Башкарма комитет җитәкчесе.

2022 елда Казанның бердәм кизү-диспетчерлык хезмәтенә су басу турында 177 хәбәр килгән. Районнарда барлыгы 104 маневр төркеме булдырылган, аларда 108 берәмлек махсус техника һәм насос җиһазлары бар. 2212 комлы капчык һәм 777 агач басмалар әзерләнгән. Ә «Водоканал» предприятиесендә 63 кешедән торган 14 маневр төркеме оештырылган.

Фото: Денис Гордийко, Марат Мөгыйнов