Ел башыннан Казанда законсыз төзелгән 229 сәүдә объекты сүтелгән

И.Метшин прокуратура белән берлектә законсыз сәүдә итүне туктату буенча нәтиҗәле механизм булдырылачагына ышаныч белдерде.

(Казан шәһәре KZN.RU, 7-нче октябрь, Ксения Швецова). Агымдагы елның 9 аенда Казанда законсыз эшли торган 229 сәүдә объекты сүтелгән. Көн саен шәһәрдә законсыз сәүдәне бетерү буенча рейдлар үткәрелә, әмма сәүдә нокталары Башкарма комитетның вәкаләтләре тәмамлана торган күп фатирлы йортлар территориясенә «күчерелә». Казан Мэры Илсур Метшин прокуратура белән берлектә күп фатирлы йортлар территориясендә законсыз сәүдә итүне туктату буенча нәтиҗәле механизм булдырылачагына ышаныч белдерде.

Казанда легаль булмаган сәүдәне кисәтү буенча эш даими алып барыла, дип хәбәр итте үзенең докладында Кулланучылар базары комитеты рәисе Руслан Фазылҗанов. Шәһәр территориясендә икенче ел инде Башкарма комитетның санкцияләнмәгән сәүдәне бетерү буенча көндәлек рейдлар үткәрү турындагы күрсәтмәсе гамәлдә, ә район администрацияләре өчен мондый объектларга каршы көрәшнең нәтиҗәле механизмы эшләнгән. Бу эш нәтиҗәсендә шәһәр территориясендә законсыз сәүдә нокталарының саны, алдагы еллар белән чагыштырганда, шактый кимеде, дип билгеләп үтте Р.Фазылҗанов. «9 ай эчендә 4200 беркетмә төзелде. Бу узган елның шул ук чоры белән чагыштырганда 2 меңгә кимрәк», - диде ул.

Шуның белән бергә, әлеге проблема өстендә тулысынча җиңүне билгеләргә иртәрәк әле, чөнки намуссыз эшмәкәрләр еш кына законсыз урнаштырылган сәүдә объектларын муниципаль җирдән күпфатирлы йортларның йорт яны территориясенә күчерәләр, дип ассызыклады Р.Фазылҗанов. Мондый объектларны урнаштырганда, күпфатирлы йортта яшәүчеләрнең ризалыгы кирәк – бу торак законнар нормаларында каралган. Әмма еш кына эшмәкәрләр аннан башка гына эш итә. Мондый объектларны суд аша гына сүтәргә мөмкин, моңа бер ай вакыт сарыф ителә.

Ул Казан шәһәр Думасының законсыз объектларны демонтажлау турындагы карарына үзгәрешләр кертү кирәклеге турында әйтте. «Законсыз сәүдә объектларының йорт яны территорияләрендә урнашуына юл куймас өчен, без нәтиҗәле хокукый механизм эшлибез», - дип сөйләде Р.Фазылҗанов. Аның сүзләренә караганда, Казан шәһәр Думасының санкцияләнмәгән сәүдә объектларын демонтажлау турындагы карарына үзгәрешләр кертү планлаштырыла. «Тагын да киңәйтелгән вәкаләтләргә ия булып, без шәһәр халкына уңайлылык тәэмин итә һәм шәһәрнең йөзен яхшырта алачакбыз», - дип аңлатты Кулланучылар базары комитеты рәисе.

Казанда законсыз сәүдә белән көрәш механизмы инде күптән эшләнелгән, дип билгеләде шәһәр Мэры Илсур Метшин. «Норматив актларда җитешсезлекләр бар, аларны безгә юкка чыгарырга кирәк, - дип өстәде ул. - Йортларда яшәүчеләр моның өчен тавыш бирмәүләрен тикшергән арада, аларның йортлары территориясендә сәүдә нокталары пәйда булачак. Боларның барысын да күрдек: сәүдәдән калган пычрак, бардак әлеге күп фатирлы торак йортларның ишегалларында. Бу эшмәкәрләр салым түләми генә түгел, ялган товар белән дә сәүдә итә, бу инде башкала халкының һәм кунакларының сәламәтлегенә дә кагыла».

Хокук кырына күчәргә әзер булган эшмәкәрләргә ярдәм күрсәтелә, дип билгеләп үтте Р.Фазылҗанов. 2019 елга сезонлы сәүдә объектларын урнаштыру схемасын эшләгәндә, белгечләр узган елда, легаль булмаган нокталарның күп булуы ачыкланганда, урам сәүдәсен тулысынча инвентаризацияләү нәтиҗәләрен исәпкә алдылар. Бу мәйданчыкларны схемага керткәннәр һәм, шулай итеп, элек легаль булмаган рәвештә эшләгән эшкуарлар быел аукционнарда җиңеп, хокук кырына күчкәннәр.