Эпидсезон башланганнан бирле Татарстанда яшәүче 10 меңнән артык кеше талпан тешләүдән медицина ярдәме сорап мөрәҗәгать иткән

Бу узган елның шул ук күрсәткеченнән 1,6 тапкырга югарырак.

Фото: Денис Гордийко

(Казан шәһәре KZN.RU, 13 нче октябрь). Быел 12 нче апрельдән исәпләнә торган эпидемия сезоны башланганнан бирле Татарстанның медицина оешмаларына талпан тешләгән 10 мең 36 кеше мөрәҗәгать иткән. Бу узган ел белән чагыштырганда 1,6 тапкырга артыграк һәм күпьеллык уртача күрсәткечтән – 14,5% ка.

Татарстанда талпан энцефалиты белән авыру очраклары теркәлмәгән. Иксод талпан боррелиозы белән 35 кеше авырып киткән, бу узган елгы күрсәткечтән 1,5 тапкырга артыграк, 22 кеше зарарланган.

Талпан тешләү очраклары республиканың барлык муниципаль берәмлекләрендә теркәлгән. Талпан вирус энцефалиты буенча эндемик булган, Казанны да кертеп, 30 административ территориядә талпан кадалуның 89,9% очрагы булган. Талпаннар ешрак урманнарда һәм урман массивларында – 40%, бакча-дача участокларында – 28,4%, шәхси хуҗалыкларда – 14,3% һәм халык күп җыела торган урыннарда 4,3% кадалган. Калган очраклар Татарстаннан читтә булган.

Эпидсезон башыннан алып кешеләрдән алынган 2735 талпан тикшерелгән: иксод талпан боррелиозын кузгатучы шуларның 872 сендә (гомуми санның 32% ы) бүленеп чыккан, талпан вируслы энцефалитын кузгатучы табылмаган, дип хәбәр итә Россия кулланучылар күзәтчелегенең ТР буенча идарәсе матбугат хезмәте.

Татарстанда талпанга каршы эшкәртү 2217,1 га мәйданда башкарылган, шул исәптән 672 га җәйге сәламәтләндерү оешмалары территорияләре.

Быел талпан вируслы энцефалитыннан республиканың 2106 кешесе прививкаланган, 3528 кеше ревакцинацияләнгән. Талпанга каршы иммуноглобулинны 2254 кеше алган, шул исәптән 913 бала.

Россия кулланучылар күзәтчелегенең ТР буенча идарәсе көзен талпаннарның әле актив булуын искә төшерә.

Шулай ук укыгыз

Барлык яңалыклар