Узган елның декабреннән башлап Татарстанга коронавирустан миллионнан артык доза вакцина кайтарылган

Республика халкы өчен поликлиникалардан тыш вакцинация пунктлары аеруча популяр.

Фото: Марат Мугинов

(Казан шәһәре KZN.RU, 6-нчы август). 4-нче августта Татарстанга коронавирус инфекциясеннән чираттагы «Спутник V» вакцина партиясе кайтарылды. Узган елның декабреннән республикага COVID-19-дан 1 млн 33 мең 543 доза төрле вакцина кертелгән.

Бүгенге көнгә вакцинацияне 863 мең 275 татарстанлы узган, шуларның 642 мең 587-се икенче компонент белән вакцинацияләнгән, дип хәбәр итте бүген «Татар-информ» мәгълүмат агентлыгында узган матбугат конференциясендә ТР Сәламәтлек саклау министры урынбасары – ТР Сәламәтлек саклау министрлыгының Казан буенча Идарәсе башлыгы Владимир Жаворонков.

«Бүгенге көндә безнең вакциналарның барлык төрләре һәм прививка кампаниясен дәвам итү өчен дозалар җитәрлек күләмдә», – дип билгеләде ул.

Белгечләр билгеләп үткәнчә, Казанда яшәүчеләр поликлиникаларга караганда вакцинациянең мобиль пунктларында прививка ясауны өстен күрә. Әйтик, июль аенда сәүдә үзәкләрендә урнашкан вакцинация пунктларында 8 меңнән артык кеше прививка ясаткан, метрополитен станцияләре янында – 11 меңгә якын кеше.

В.Жаворонков сүзләренә караганда, Татарстан Республикасы башкаласында «Яшлек» метро станциясе янында вакцинация пункты аеруча популяр – анда 3,5 меңнән артык кеше прививка ясаткан, «Кәҗә бистәсе» метро станциясе янында – 3 меңнән артык кеше. Сәүдә үзәкләрендә эшләүче һәр пунктта вакцинацияне 2,2 меңнән 2,5 меңгә кадәр кеше узган.

Исегезгә төшерәбез, узган атнада Казанда Казанның мәдәният йортларында коронавирус инфекциясеннән вакцинацияләүнең өстәмә дүрт мобиль пункты эшли башлады: прививканы Ленин исемендәге мәдәният йортында, «Сәйдәш», «Мәскәү» һәм «Залесный» мәдәни үзәкләрендә ясатырга була. Алар тест режимында учреждениеләр графигы буенча эшли. Шәһәр халкы активлыгына карап вакцинация пунктларының эш графигы төзәтелергә мөмкин.

Шулай ук укыгыз

Барлык яңалыклар