8 июньнән Иске Татар бистәсендә ачык һавада фильмнар күрсәтелә башлый

Фильмнар шимбә көнне оештырылачак, якынча 20.30 сәгатьтә күрсәтеләчәк.

(Казан шәһәре KZN.RU, 5-нче июнь, Алинә Бережная). 8-нче июньнән Казанның Иске Татар бистәсендә ачык һавада фильмнар күрсәтелә башлый. Импровизацияләнгән кинотеатр Шиһабетдин Мәрҗани урамындагы 10-нчы номерлы йорт янында урнашачак. Бу хакта бүген «Татар-информ» мәгълүмат агентлыгында узган матбугат конференциясендә «Тарихи мохит» муниципаль бюджет учреждениесе директоры Марат Корнилов сөйләде.

Фильмнар шимбә көнне оештырылачак, якынча 20.30 сәгатьтә күрсәтеләчәк. «Барысы да кояш бату вакыты белән бәйле булачак, чөнки көндезге вакытта фильмнарны карау мөмкин түгел», - дип аңлатты М.Корнилов. Кинотеатр җәй буе эшләячәк.

Тамашачыларга җайлы булсын өчен уңайлы урындыклар әзерләнәчәк, аны карау өчен шулай ук газоннарда да утырырга мөмкин булачак. Спикер сүзләренә караганда, кинотеатрның гомуми сыйдырышлылыгы якынча 400 урын.

8-нче июньдә тамашачылар күрәчәк беренче фильм - «Пеле: Рождение легенды». Проект кысаларында тамашачыларга «Татаркино» фондларыннан Татарстан һәм Россия кинематографистларының документаль һәм нәфис кыска метражлы һәм тулы метражлы фильмнары тәкъдим ителәчәк.

Шулай ук импровизацияләнгән кинотеатрда «Киносреда» кысаларында күрсәтелә торган фильмнар күрсәтеләчәк. «Тамашачылар илебез һәм чит ил комедияләрен күрә алачак. Бу жанр яшьләр арасында популяр, шуңа күрә фильмнар кызыксыну тудырыр дип өметләнәбез. Өстәвенә, комедияләр искерми», - диде «Татаркино» дәүләт бюджет мәдәният учреждениесе директоры Миләүшә Айтуганова.

Моннан тыш, Иске Татар бистәсендә 21-23 июнь көннәрендә узачак «Төрки кино атнасы» кысаларында төрки фильмнар күрсәтү планлаштырыла, ә 22-29 август көннәрендә кинотеатрда татар режиссерлары картиналары күрсәтеләчәк.

Исегезгә төшерәбез, шулай ук 30-нчы майда Казанның «Крылья Советов» паркында «Ретро-пәнҗешәмбе» чарасы кысаларында бушлай кино күрсәтү циклы башланды. Саф һавада киносеанслар атна саен җәй ахырына кадәр узачак.

Шулай ук укыгыз

Барлык яңалыклар