1 нче апрельдән Россиядә социаль пенсияләр күләме артачак

Быел индексацияләү коэффициенты, шул исәптән иминият түләүләре өчен дә, 1,075 тәшкил итте

Фото: Денис Гордийко

1 нче апрельдән Россиядә социаль пенсияләр индексацияләнәчәк. Әлеге карар нигезендә 4,1 млн кешенең пенсиясе артачак. Быелның төп үзенчәлеге шунда – социаль һәм иминият пенсияләрен индексацияләү коэффициенты бер үк. Ул 1,075 (яки 7,5%) тәшкил итә.

Социаль пенсияләр күләмен 1 нче апрельдән арттыру турындагы карарны РФ Хөкүмәте элегрәк раслаган иде. Түләүләр узган елда илдә пенсионерлар өчен билгеләнгән яшәү минимумы үсеше темпларын исәпкә алып индексацияләнә.

Социаль пенсияләр стажга һәм тупланган пенсия балларына бәйле түгел, шуңа күрә түләүләр иминият пенсиясенә хокук булмаган очракта да билгеләнә. Мондый пенсияләрне картлык, инвалидлык буенча, туйдыручыны югалту сәбәпле алалар, шулай ук ул ата-аналары билгесез балаларга да тиеш. Социаль пенсияләр, иминият пенсияләреннән аермалы буларак, фиксацияләнгән күләмдә түләнә.

Индексацияләнгәннән соң, социаль пенсиянең уртача күләме 2024 елда 13,5 мең сумга җитәчәк – бу иминият пенсиясе күләменнән якынча ике тапкырга кимрәк.

Төрле категорияләр өчен социаль пенсия күләме ничек үзгәрәчәк?

картлык буенча – 7689,48 сум (7153,33 сум урынына);

туйдыручыны югалту сәбәпле – 7689,48 сум (7153,33 сум урынына);

әти-әни билгесез яки үлгән булсалар – 15 мең 379,73 сум (14 мең 306,73 сум урынына);

I төрем инвалидларга – 15 мең 379,73 сум (14 мең 306,73 сум урынына);

II төрем инвалидларга – 7689,48 сум (7153,33 сум урынына);

III төрем инвалидларга – 6536,41 сум (6080,38 сум урынына);

балачактан I төркем инвалидларга һәм инвалид балаларга – 18 мең 455,42 сум (17 мең 167,83 сум урынына);

балачактан II төркем инвалидларга – 15 мең 379,73 сум (14 мең 306,73 сум урынына);

Төньякның аз санлы халыклары вәкилләренә (55 яшьтәге ирләр һәм 50 яшьтәге хатын-кызлар өчен) – 7689,48 сум (7153,33 сум урынына).

Социаль пенсияләрне индексацияләү автомат рәвештә башкарыла, шуңа күрә аны алучыларга беркая да мөрәҗәгать итәргә кирәкми. Россиянең социаль фонды акчаларны апрель аенда гадәти график буенча түләячәк.

Шулай ук укыгыз

Барлык яңалыклар