Рөстәм Гафаров капремонтка акчаны махсус счетларда саклаган торакчыларга: «Казан ысулы – куркыныч түгел, ә коткару»

Казанның сигез йортында яшәүчеләргә лифтларны алыштыру өчен милекчеләр җыйган акча җитми

Фото: KZN.RU

(Казан шәһәре KZN.RU, 24 нче июль, Юлия Летникова). Казанда быел торак фондын капиталь ремонтлау программасына 12 йорт кертелгән, анда яшәүчеләр махсус счетта акча туплый. Аларның сигезендә лифтларны алыштырырга кирәк, әмма милекчеләр җыйган акча җитми. Программа регоператорының гомуми казаны аларга эләкми, чөнки милекчеләрнең кертемнәре аңа керми, ә Татарстанда мондый йортларны капиталь ремонтлауны бюджеттан финанслау механизмы кабул ителмәгән. Проблеманы хәл итү вариантлары турында Башкарма комитетта аппарат киңәшмәсендә фикер алыштылар.

«Кайбер йортларда акчаны махсус счетларда туплыйлар, алар белән аерым проблема бар. Алар бу – акчаларга уртак казанда югалмаска мөмкинлек бирә дип уйлыйлар, ләкин без хәзер риск түгел, ә коткару юлы дип саныйбыз. Лифтларның эксплуатация срогы чыга, ә аларны алыштыру өчен йортлардан бик озак акча тупларга туры киләчәк, шуңа күрә ярдәмгә казан ысулы килә», – дип билгеләп үтте Башкарма комитет җитәкчесе Рөстәм Гафаров.

Мәсәлән, «Кмизовец-2» торак-төзелеш кооперативы (Спартак урамы, 89) махсус счетта 2,5 млн сум җыйган. Быел аларга ике лифтны алыштырырга кирәк, берсен алыштыру бәясе – 3,5 млн. Документлар эшләүне һәм төзелеш контролен исәпкә алып, ике лифтны алмаштыру 7,32 млн сумга төшәчәк, тагы 4,7 млн сум кирәк булачак.

ТКХ комитеты рәисе Василий Лысачкин проблеманы хәл итүнең ике вариантын тәкъдим итте: милекчеләр өстәмә рәвештә капиталь ремонт өчен җитмәгән акчаларны җыялар яки тупланган акчаларны регоператор фондына күчерәләр.

«Иске йортларның берсе дә ремонт өчен җитәрлек акча җыя алмый. Шуңа күрә бюджеттан финанслау һәм уртак казан эчендә акчаларны яңадан бүлү мөмкин түгел. Җыелган акчаларны регоператор фондына күчерү һәм йортларның программада гомуми тәртиптә катнашуы ситуациядән чыгу юлы булып тора», – дип билгеләп үтте спикер. Ул Казанда – яшәүчеләре махсус счетларда акча җыйган 596 йорт бар дип өстәде. «Район башлыкларыннан тагын бер тапкыр милекчеләргә мәгълүмат җиткерүләрен һәм аларга карар вариантларын тәкъдим итүләрен сорыйм», – дип мөрәҗәгать итте комитет рәисе.

Рөстәм Гафаров, үз чиратында, хөкүмәт комиссиясе Дәүләт торак инспекциясенә йортларны капиталь ремонтлауга кагылышлы торак милекчеләренең гомуми җыелышлары беркетмәләре реестрын алып бару бурычын йөкләячәк закон проектын хуплады, дип билгеләп үтте. «Бу беркетмәләрне ялганлауны булдырмаска һәм идарәче компанияләрне, торак милекчеләре ширкәтен капиталь ремонт өчен җыелган акчаны башка максатларга сарыф итү вәсвәсәсеннән сакларга ярдәм итәчәк», – дип билгеләп үтте Башкарма комитет җитәкчесе.