Рөстәм Гафаров: «Башкала, нинди генә кыенлыкларга карамастан, масштаблы вакыйгаларны кабул итәргә һәрвакыт шат»

Узган атнада Казанда зур спорт вакыйгалары узды, шул исәптән OLIMPBET өчен футбол буенча Россия Суперкубогы матчы

Фото: Денис Гордийко

(Казан шәһәре KZN.RU, 17 нче июль, Юлия Летникова). Узган атнада Казан илнең төп футбол вакыйгалары аренасына әверелде. Башкарма комитет җитәкчесе Рөстәм Гафаров оештыручыларга ике матчны лаеклы уздырганнары өчен рәхмәт белдерде: Үзәк стадионда Россия һәм Иранның хатын-кызлар җыелма командалары очрашты, ә «Ак Барс Арена»да «Зенит» һәм ЦСКА клублары OLIMPBET Россия Суперкубогы өчен көрәште. «Башкала, нинди генә кыенлыкларга карамастан, төрле масштаблы вакыйгаларны үзендә кабул итәргә һәрвакыт шат», – дип билгеләп үтте ул.

Рөстәм Гафаров футбол буенча Россия хатын-кызлар җыелма командасының беренче тапкыр Казан кырында уйнавын искәртте. «Безнең кызларга Казан җанатарларының зур армиясе көч биреп торды, команда составында Татарстаннан ике кыз – Алсу Абдуллина һәм Казан кызы Зарина Шәрифова бар иде. Безнең җыелма команда 4:0 исәбе белән җиңде», – дип ассызыклады Башкарма комитет җитәкчесе.

Тулы трибуналар һәм бәйрәм атмосферасы шимбә көнне «Ак Барс Арена» стадионында дәвам итте, анда футбол буенча Россия Суперкубогы өчен «Зенит» һәм ЦСКА клублары көрәште. Пенальти нәтиҗәләре буенча Санкт-Петербург командасы җиңде. «Казанга бик күп җанатарлар килде, аларның кайберләре, кызганычка каршы, һәрвакытта да үзләрен тиешенчә тотмады», – диде Рөстәм Гафаров.

«Урам» экстрим-паркындагы истәлекле матчлардан тыш, «Матч ТВ урам уеннары» узды. Алар Россиянең 50 төбәгеннән 1200 дән артык спортчыны җыйды.