Рөстәм Гафаров: «Мәктәп яны лагерьлары — эшләүче ата-аналарга яхшы ярдәм»

21 көн дәвамында 8:00 дән 16:00 га кадәр укучылар өчен мастер-класслар, киносеанслар, спорт уеннары һәм ветераннар белән очрашулар оештырыла

Казанның 19 меңнән артык укучысы җәйге чорда мәктәп яны лагерьларында ял итәчәк. Сменалар 165 мәгариф учреждениесендә оештырыла, алар 26 июньгә кадәр дәвам итәчәк. Барлык оештырылган чаралар Бөек Ватан сугышында Җиңүнең 80 еллыгына һәм Ватанны саклаучылар елына багышланачак. Бу хакта эшлекле дүшәмбедә Мәгариф идарәсе җитәкчесе Ирек Ризванов хәбәр итте.

Мәктәп яны лагерына юллама бәясе 21 көнгә 817 сум тәшкил итәчәк, калган өлеше республика бюджетыннан финансланачак. Махсус хәрби операциядә катнашучыларның балалары өчен ял бушлай оештырыла.

«Мәктәп балалары өчен без ялның төрле вариантларын әзерлибез. Мәктәп яны лагерьлары — эшләүче ата-аналарга яхшы ярдәм. Асылда бер ай буе бала арзан бәягә күзәтү астында тора һәм вакытын сәламәтлек һәм үсеш өчен файдалы итеп үткәрә», – диде Казан Башкарма комитеты җитәкчесе Рөстәм Гафаров.

Көн саен 8:00 дән 16:00 га кадәр балалар тематик мастер-классларга йөриячәк, анда сувенирлар ясаячаклар, шулай ук сугыш турында нәфис һәм документаль фильмнар караячаклар.

«Ветераннар һәм тыл хезмәтчәннәре белән очрашулар аерым урын алачак – халкыбызның батырлыгы турында батырларның үзләреннән белү мөмкинлеге. Шулай ук рухи көч һәм Ватанга мәхәббәт тәрбияләүче хәрби-спорт уеннары һәм конкурслар узачак», – дип өстәде Ирек Ризванов.

Җәйге каникулларга әзерлек чорында барлык мәгариф учреждениеләрендә куркынычсызлык көннәре һәм сыйныф сәгатьләре үткәрелә. Балаларда үз-үзеңне куркынычсыз тоту күнекмәләрен формалаштыру эше ЮХИДИ, гадәттән тыш хәлләр министрлыгы һәм башка тәҗрибәле органнар ярдәмендә башкарыла.

«Мәктәп яны лагерьларында гына түгел, каникулга чыгар алдыннан юл хәрәкәте кагыйдәләре буенча өстәмә чаралар яки укулар үткәрүегезне сорыйм. Җәйне мөстәкыйль рәвештә үткәрәчәк балаларыбыз үз белемнәрен тагын бер кат тикшереп, дөрес куллансын өчен эшләнелә», – дип тәмамлады Рөстәм Гафаров Мәгариф идарәсе башлыгына.