Рөстәм Гафаров: «Без авыр тормыш хәлендә калган һәр балага үзләрен күрсәтергә мөмкинлек бирергә тиеш»

«Игелекле дулкын» фестивалендә катнашу өчен гаризалар кабул итү дәвам итә.

(Казан шәһәре KZN.RU, 19-нчы июнь, Алинә Бережная). «Игелекле дулкын» бөтенроссия балалар иҗаты мәдәни-хәйрия фестивалендә катнашу өчен гаризалар кабул итү дәвам итә. Бүген эшлекле киңәшмәдә Казан Башкарма комитеты җитәкчесенең беренче урынбасары Рөстәм Гафаров сәләтле һәр балага үзләренең иҗади сәләтләрен күрсәтергә мөмкинлек бирергә һәм потенциаль катнашучыларга максималь рәвештә хәбәр җиткерергә кушты. Киңәшмәдә Казан районнары башлыклары урынбасарлары, ТР Яшьләр эшләре министрлыгы, ТР Хезмәт, халыкны эш белән тәэмин итү һәм социаль яклау министрлыгы вәкилләре, шулай ук иҗат коллективлары, музыка һәм сәнгать мәктәпләре һәм башка өстәмә белем бирү учреждениеләре вәкилләре катнашты.

«Игелекле дулкын»да катнашу өчен гаризалар бирү кампаниясе 7-нче июньдә старт алды һәм 29-нчы июньгә кадәр фестивальнең рәсми сайтында дәвам итәчәк. Рөстәм Гафаров фестиваль инде өченче ел рәттән бер сәхнәдә бөтен Россиядән катлаулы тормыш хәленә тарыган талантлы балаларны берләштерә, дип искәртте.

Сәләтле балалар конкурсы Президент грантлары фонды, Татарстан Республикасы Хөкүмәте һәм «Игелекле Казан» хәйриячелекне үстерүгә ярдәм фонды ярдәмендә үткәрелә, ә Игорь Крутой Академиясе һәм Казан Мэриясе оештыручы булып тора.

Фестивальнең сайлап алу турлары гадәттәгечә Казанда башлана. 1-нче июльдә «Мәскәү» мәдәни-күңел ачу үзәгендә сайлап алу туры узачак, ә 2-нче июльдә «Пирамида»да төбәк гала-концерты була. Аннары сайлап алу турлары Ярославль, Севастополь, Ростов-на-Дону, Владивосток, Новосибирск, Курск, Санкт-Петербург, Екатеринбург, Калининград һәм Мәскәүдә оештырыла.

«Фестивальнең төп бурычы – хәйрия культурасын үстерү, яшь талантларга ярдәм итү. Хәзер без һәр бала үз сәләтен күрсәтә алсын өчен барлык потенциаль катнашучыларга да максималь рәвештә хәбәр җиткерергә тиеш», - диде Р.Гафаров.

Популяр музыка академиясе филиалы директоры Игорь Крутой сөйләгәнчә, фестиваль балаларга төрле жанрларда үз иҗатларын күрсәтергә мөмкинлек бирә, алар арасында музыка (вокал, ишарә белән җырлау, уен коралында уйнау), хореография, сәхнә сәнгате (үзенчәлекле жанр, уку) бар.

«Игелекле дулкын» - балалар өчен якты бәйрәм, әлеге чара матур фестивальдә катнашу мөмкинлеге бирә», - дип билгеләп үтте Е.Городецкая.

28-нче ноябрьдә Казанда узачак гала-концерт фестивальнең кульминациясе булачак.

Фестиваль күп балаларның хыялларын тормышка ашырып кына калмый, алар өчен сәләтләрен ачуга старт мәйданчыгы да булачак, дип билгеләп үтте Татарстан Республикасы яшьләр эшләре министры ярдәмчесе Алсу Сәетова. «Балаларга йолдызлар белән бер сәхнәдә чыгыш ясау мөмкинлеге биреләчәк, шулай ук киләчәктә дә иҗат белән шөгыльләнә алыр өчен премияләр тапшырылачак», - дип билгеләп үтте ул.

«Талант берни белән дә чикләнергә тиеш түгел, без авыр тормыш хәлендә калган һәр балага сәхнәгә чыгарга һәм үзләрен күрсәтергә мөмкинлек бирергә тиешбез», - дип йомгаклады Р.Гафаров.