Рөстәм Миңнеханов һәм Илсур Метшин Габдулла Тукай һәйкәленә чәчәкләр салдылар

Бүген Казанда Туган тел көненә һәм шагыйрьнең тууына 137 ел тулуга багышланган тантаналы чаралар уза.

Фото: Марат Мөгыйнов

(Казан шәһәре KZN.RU, 26 нчы апрель). Бүген Казанда Туган тел көненә һәм Габдулла Тукайның тууына 137 ел тулуга багышланган тантаналы чаралар уза.

Бәйрәм программасы Казан үзәгендәге татар шагыйре һәйкәленә традицион рәвештә чәчәкләр салудан башланды. Тантанада ТР Рәисе Рөстәм Миңнеханов, ТР Дәүләт Киңәшчесе Минтимер Шәймиев, ТР Рәисе администрациясе җитәкчесе Әсгать Сәфәров, Казан Мэры Илсур Метшин һәм башкалар катнашты. Шулай ук иҗади интеллигенция һәм җәмәгатьчелек вәкилләре, мәдәният һәм сәнгать эшлеклеләре, ТР Дәүләт Советы депутатлары чәчәкләр салды.

Габдулла Тукайның туган көнен һәм Туган тел көнен бәйрәм итү республикада аерым әһәмияткә ия. Габдулла Тукай рус һәм чит ил классикларының әсәрләрен татар теленә күпләп тәрҗемә иткән, татар вакытлы газеталары һәм журналлары булдыруда башлап йөргән, үз әсәрләренә иллюстрацияләр керткән беренче мөселман шагыйрьләрнең берсе була, аның каләменнән чыккан әсәрләр укытучылар һәм тикшеренүчеләр өчен әле дә уку әсбаплары булып тора.

Исегезгә төшерәбез, бүген Рөстәм Миңнехановның Татарстанның иҗади зыялылары белән очрашуы, шулай ук Туган тел көне һәм Габдулла Тукайның тууына 137 ел тулу уңаеннан үткәрелә торган башка чаралары планлаштырылган, дип хәбәр итә ТР Рәисе матбугат хезмәте.