Татарстан Президенты һәм Казан Мэры яңа кунакханә комплексында булдылар

Кунакханә аэропорт һәм «Казан Экспо» күргәзмә үзәге янында урнашкан.

Фото: Денис Гордийко

(Казан шәһәре KZN.RU, 14-нче гыйнвар). Татарстан Президенты Рөстәм Миңнеханов һәм Казан Мэры Илсур Метшин «Казан» халыкара аэропорты янында төзелгән яңа кунакханә комплексында булдылар. Kravt Hotel Kazan Airport отеленә 4 йолдыз категориясе бирелгән. Мәйданы 20 мең квадрат метр булган 9 катта төрле категорияләрдәге 240 номер урнашкан. Кунакханә комплексына аэропорт һәм «Казан Экспо» күргәзмә үзәге бинасыннан җылы күчү юлы үткәрелгән.

Кунакханәдә конференц-зал, ресторан, спорт залы һәм спа-комплекс җиһазландырылган. Дизайнда Татарстан Республикасының милли мотивлары чагылдырылган, ә төзелештә иң экологик материаллар кулланылган. Р.Миңнеханов кунакханәнең җиһазланышын югары бәяләде һәм әлеге объектка шәһәр кунаклары арасында ихтыяҗ зур булачагына ышаныч белдерде, дип хәбәр итә ТР Президенты матбугат хезмәте.

Рөстәм Миңнехановка хәбәр ителгәнчә, хәзерге вакытта номерлар фондын җиһазландыру процессы тәмамланып килә – мебель һәм декор әйберләрен урнаштыру эше бара. Беренче кунакларны бу елның язында кабул итү планлаштырыла.

Видеорепортаж