«Рубин» клубы «Оренбург» белән Россия премьер-лигасының икенче турының беренче өй матчын уйнаячак

Уенга керү өчен җанатар картасын ясарга кирәк

Фото: Денис Гордийко

(Казан шәһәре KZN.RU, 28 нче июль). Казанның «Рубин» футбол клубы «Оренбург» белән Россия премьер-лигасының икенче турында уйнаячак. 30 нчы июльдә «Ак Барс Арена»да узачак матч «Рубин»ның яңа сезонда беренче өй уены булачак.

Футболчылар кырга 15:00 сәгатьтә чыгачак. Уенга бару өчен билет сатып алырга һәм җанатар картасын рәсмиләштерергә кирәк, дип хәбәр иттеләр «Рубин»ның матбугат хезмәтендә.

Бүгенге көндә Fan IDны рәсмиләштерүнең ике ысулы бар – һәр очракта да РФ Дәүләт хезмәтләре порталында теркәлергә һәм хисап язмасын расларга кирәк булачак.

Җанатар картасын рәсмиләштерүнең иң киң таралган ысулы – Дәүләт хезмәтләре порталы аша гариза бирү. Махсус бүлектә карта иясен – өлкән кешене яки 14 яшькә кадәрге баланы сайларга кирәк. Аннары шәхси һәм контакт мәгълүматлары булган кырларны тутырырга, фотоны йөкләргә кирәк. Шуннан соң шәхси кабинетка дәүләт хезмәтләре сайтында яки күрсәтелгән электрон почта адресына КФҮ бүлекчәсенә барырга чакыру белән хәбәр киләчәк. Бу шәхесне раслау өчен кирәк. Үзең белән паспорт алу сорала.

14 яшькә кадәрге балаларга күпфункцияле үзәккә бармыйча гына җанатар картасын рәсмиләштерергә мөмкин. Әгәр ата-ана дәүләт хезмәтләре сайтында бала турында мәгълүмат белән кырларны тутырган булса, Fan ID автомат рәвештә рәсмиләштереләчәк.

Мәгълүматны тикшергәннән соң, җанатар картасы дәүләт хезмәтләре порталындагы шәхси кабинетта булачак.

Fan IDны күпфункцияле үзәккә бармыйча рәсмиләштерергә мөмкин, моның өчен яңа үрнәктәге чит ил паспорты яки бердәм системадан биометрия кирәк. Шулай ук Android операцион системасында NFC-модульле смартфон, «Дәүләт хезмәтләре. Җанатар картасы» һәм «Биометрия дәүләт хезмәтләре» кушымталары кирәк булачак.

Шулай ук укыгыз

Барлык яңалыклар