ТР буенча Россия кулланучылар күзәтчелеге: «Татарстанда коронавирус белән авыру очракларының бераз артуы күзәтелә»

Республикада соңгы өч ай эчендә күмәк иммунитетның кимүе күзәтелә һәм ул 6,9% тәшкил итә.

Фото: Марат Мөгыйнов

(Казан шәһәре KZN.RU, 29 нчы июль, Дмитрий Никитин). Коронавирус йогышы белән авыручылар санының торышы тотрыклы кала һәм чикләү чараларын катгыйландыру әлегә каралмый. «Барысы да гомуми санитар-эпидемиологик фоннан тора. Сезонлы эпидемиология чоры якынлаша һәм аның дәвамлылыгы коллектив иммунитеттан торачак», – дип билгеләп үтте бүген «Татар-информ» агентлыгында узган матбугат конференциясендә Россия кулланучылар күзәтчелегенең ТР буенча идарәсе җитәкчесе урынбасары Любовь Авдонина.

«Спутник V» вакцинасының беренче компоненты тулысынча «Спутник Лайт»ка тиңләштерелгән

Татарстанда коронавирус инфекциясе белән авыручылар санының аз гына артуы күзәтелә. Соңгы тәүлек эчендә республикада COVID-19 белән зарарлануның 47 яңа очрагы ачыкланган, ә пандемия башланганнан бирле – 153 мең 754 очрак. ТР Сәламәтлек саклау министрлыгының эпидемиология һәм иммунопрофилактика буенча баш белгече Дмитрий Лопушов билгеләп үткәнчә, республикада күмәк иммунитет соңгы өч айда кими һәм хәзерге вакытта 6,9% тәшкил итә. «Соңгы тәүлек эчендә 831 кеше вакцинацияләнде, 337 мең 521 кеше кабат вакцинация узды. Әмма план буенча, бу күрсәткеч 1 миллион 200 мең кешене тәшкил итәргә тиеш», – дип билгеләп үтте ул.

Д.Лопушов хәбәр иткәнчә, республикада 180 вакцинация пункты җәелдерелгән: 120 – үзәк хастаханәләрдә, 60 ы – мобиль пунктлар. «Коронавирус йогышы беркая да китмәде һәм халык арасында циркуляцияләүне дәвам итә», – дип ассызыклады Д.Лопушов. Ул инфекциянең авыр нәтиҗәләрен булдырмас өчен вакцинация иң нәтиҗәле ысул булып кала, дип өстәде. «Бүгенге көндә «Спутник V» вакцинасының беренче компоненты тулысынча «Спутник Лайт»ка тиңләштерелгән һәм бер үк составка ия», – диде ул.

Хәзер республикада 460 койкага исәпләнгән 18 йогышлы госпиталь җәелдерелгән, шуларның 8% ы буш. «Кирәк булганда, без койка фондын арттыра алабыз», - дип хәбәр итте Д.Лопушов. Бүгенге көндә стационарда 345 пациент бар, ә амбулатор дәвалауда – 1450 кеше. Пациентлар арасында амбулатор шартларда дәваланучы 227 бала бар, тагын 48 е хастаханәләрдә ята.

Татарстанда әлегә «Кентавр» штаммы белән авыру очраклары теркәлмәгән

Л.Авдонина билгеләп үткәнчә, Татарстанда COVID-19 ны ачыклау буенча чаралар тулы күләмдә дәвам итә. Мәсәлән, соңгы тәүлек эчендә 7,5 меңнән артык ПЦР-тест ясалган, 46 самолет, аларның 12 се чит илләрдән килгән, 5 меңгә якын пассажир һәм экипаж әгъзалары тикшерелгән. «Килүчеләр арасында коронавирус йогышы белән авыруның бер генә очрагы да ачыкланмаган. Моннан тыш, республикада әлегә яңа «Кентавр» штаммы белән авыруның бер генә очрагы да теркәлмәгән. Ул шулай ук чит илләрдән кайткан барлык кешеләрнең дә дәүләт хезмәтләре сайтында үз мәгълүматларын теркәргә тиешлеген искәртте. Вакцинация яки кичерелгән авыру турында гамәлдәге сертификаты булмаган затлар өч көн эчендә ПЦР-тест тапшырырга тиеш.

Күп кенә эпидемиологик чаралар гамәлдән чыгарылуга карамастан, Татарстанда көн саен ковидка каршы чикләүләрне бозу очракларын ачыклау буенча рейдлар уза. «Соңгы айда 45 закон бозу очрагы ачыкланды, 20 беркетмә төзелде, 40 мең сумнан артык суммага административ штрафлар салынды», – дип хәбәр итте Л.Авдонина.

Ул шулай ук республикада энтеровирус, эчәк, ротавирус һәм норовирус инфекцияләре, шулай ук гөмбәләр белән агулану куркынычлары кала, дип өстәде.

Шулай ук укыгыз

Барлык яңалыклар