Россия кулланучылар хокукларын яклау һәм кеше иминлеге өлкәсендә күзәтчелек федераль хезмәте ата-аналарга балалар бакчаларындагы бәйрәмнәрдә булырга рөхсәт итте

Чаралар аерым төркемнәрдә санитария кагыйдәләрен үтәп узарга тиеш.

Фото: Денис Гордийко

(Казан шәһәре KZN.RU, 26-нчы февраль, Ксения Швецова). Татарстанда һәм аның башкаласында ата-аналар балалар бакчаларындагы иртәнге бәйрәмнәргә йөри алачак. Чаралар кайбер санитар-эпидемиологик шартларны үтәп, балаларның аерым төркемнәре эчендә үткәрелергә тиеш. Бу хакта бүген «Татар-информ» мәгълүмат агентлыгында узган матбугат конференциясендә ТР буенча Кулланучылар хокукларын яклау һәм кеше иминлеге өлкәсендә күзәтчелек федераль хезмәте идарәсенең матбугат сәркатибе Миләүшә Җамалиева хәбәр итте.

Хәзер гамәлдә булган санитар кагыйдәләр нигезендә 2022 елның 1-нче гыйнварына кадәр республиканың мәгариф оешмаларында массакүләм чаралар уздыру тыела, дип искәртте М.Җамалиева. Әмма балалар бакчаларында баланың туганнарыннан бер кешене чакырып иртәнге бәйрәмнәрне үткәрергә рөхсәт иттеләр. «Без төркем эчендә индивидуаль чаралар уздыруны мөмкин дип саныйбыз. Иртәнлектә башка төркемнәрдән балалар булырга тиеш түгел – бу хокук бозу «, – дип аңлатты идарәнең матбугат сәркатибе.

Балалар бакчасында йогышлы авырулар таралмаган һәм төркемнәр карантинга ябылмаган очракта гына, ата-аналарны чакырып, иртәнге бәйрәмнәрне үткәрергә мөмкин, дип өстәде спикер. Чараны үткәрү турында карарны мәктәпкәчә яшьтәге учреждение мөдире кабул итә.

Баланы чарада 65 яшьтән өлкәнрәк булмаган бер өлкән кеше, мәҗбүри рәвештә битлектән, озата бара ала. Балалар бакчасына керер алдыннан контроль үтәргә һәм температураны үлчәргә кирәк, шулай ук килүчеләргә антисептиклар әзерләнергә тиеш. Социаль дистанцияне үтәү мөмкинлеген тәэмин итәргә кирәк – иртәнлек үткәрелә торган бинада һәр кешегә 4 кв. метрдан да ким туры килергә тиеш түгел.

Бинада бактерицид нурланыш булырга тиеш. Мөмкин булганча, өлкәннәр өчен яшел коридор булдырырга кирәк – ул башка төркем балалары белән очрашмыйча, иртәнлеккә эләгергә мөмкинлек бирәчәк.

«Мәктәпкәчә учреждениеләр администрацияләре барлык бу таләпләр турында белә. Әгәр чара үткәрү планлаштырылган бина кагыйдәләргә туры килми икән, мәсәлән, аның күләме бер кешегә 4 кв.м мәйдан бирергә мөмкинлек бирми икән, чарадан баш тартырга кирәк, яки аңа теләгән һәркем эләгә алмаячак», – дип өстәде М.Җамалиева.

Шулай ук укыгыз

Барлык яңалыклар