ТР буенча Россия кулланучылар күзәтчелеге: талпаннарның активлыгы октябрьгә туры килә

Эпидемиологик сезон башланганнан бирле медицина ярдәме сорап Казанның 2,5 мең кешесе мөрәҗәгать иткән.

Фото: Марат Мөгыйнов

(Казан шәһәре KZN.RU, 3 нче октябрь). Эпидемиологик сезон башыннан Татарстанның медицина оешмаларына талпан тешләү очраклары белән 9288 кеше мөрәҗәгать иткән, шуларның 2569 ы – Казан халкы. Бу узган ел белән чагыштырганда 62,6% ка һәм күпьеллык уртача күрсәткечтән 14,5% ка артыграк. ТР буенча Россия кулланучылар күзәтчелеге хәбәр иткәнчә, талпаннарның активлыгы апрель һәм октябрьгә туры килә.

Талпан энцефалиты буенча республиканың 30 административ территориясе эндемик булып тора, шул исәптән Казан. Бу территорияләрдә талпан кадалу очракларының 89,9% булган.

Эпидсезон башыннан республикада кешеләрдән алынган 2131 талпан тикшерелгән: иксод талпан боррелиозын кузгатучы шуларның 682 сендә бүленеп чыккан (гомуми санның 32% ы), талпан вируслы энцефалитын кузгатучы табылмаган.

Татарстанда талпанга каршы эшкәртү 2217,1 га мәйданда башкарылган, шул исәптән 672 га җәйге сәламәтләндерү оешмалары территорияләре эшкәртелгән.

Быел талпан вируслы энцефалитыннан республиканың 4330 кешесе, шул исәптән 655 бала прививкаланган.

Талпан тешләгән очракта, бөҗәкне алу өчен медицина оешмасына мөмкин булганча тизрәк мөрәҗәгать итәргә кирәк. Шуннан соң, энцефалитны профилактикалау кирәкме-юкмы икәнлеген билгеләү өчен аны лаборатор тикшеренүгә илтеп бирү сорала.

Медицина ярдәме сорап мөрәҗәгать итү мөмкинлеге юк икән, талпаннарны үзегезгә алырга кирәк. Тешләнгән урынны теләсә нинди чара (спирт яки йод) белән дезинфекцияләргә, шуннан соң кулларны сабынлап юарга киңәш ителә. Чыгарылган талпанны герметик рәвештә ябыла торган савытка төреп куярга һәм ТР Гигиена һәм эпидемиология үзәгенә (Сеченов ур., 13а) китерергә кирәк.

Шулай ук укыгыз

Барлык яңалыклар