Казандагы Самосыр полигонын рекультивацияләү 90% ка башкарылган

Эшләр тәмамланганнан соң территориядә парк зонасы булдырырга планлаштыралар

Фото: Денис Гордийко

(Казан шәһәре KZN.RU, 20 нче ноябрь, Камилә Вилданова). Казанда Самосыр полигонын рекультивацияләү 90% ка башкарылган. Эшләр график буенча бара, ә алар тәмамланганнан соң территориядә парк зонасы булдыру планлаштырыла. Рекультивацияне «Экология» илкүләм проектының «Чиста ил» программасы буенча үткәрәләр. Бу хакта эшлекле дүшәмбедә Башкарма комитет җитәкчесе урынбасары Илдар Шакиров хәбәр итте.

Аның сүзләренчә, Самосыр полигонын рекультивацияләү белән бер үк вакытта Казанның биологик чистарту корылмаларын реконструкцияләү дәвам итә. Моның өчен 808 млн сум каралган. Эшләрне 2024 елда тәмамларга планлаштыралар, бу шәһәр агынтыларын чистарту сыйфатын яхшыртырга һәм кабул ителгән агынты сулар күләмен арттырырга мөмкинлек бирәчәк.

«Бу яңа объектларны төзү һәм канализация челтәрләренә тоташтыру өчен мөһим», – дип аңлатты Илдар Шакиров.

Казанның биологик чистарту корылмалары реконструкциясе «ТР территориясендә Иделне сәламәтләндерү» проекты буенча үткәрелә. Аның кысаларында шәһәрдә ләм кырларын рекультивациялиләр – моңа 1 млрд 400 млн сум акча бүлеп бирелгән. Исегезгә төшерәбез, эшләр 2021 елда башланды һәм 2024 елда тәмамланачак. Казандагы ләм кырлары Куйбышев сусаклагычы янындагы су саклау зонасында урнашкан, ул җир дамбалары белән уратып алынган һәм каскадларга берләштерелгән карталар системасыннан гыйбарәт. Чистарту корылмаларын 50 ел куллану дәверендә ләм кырлары территориясе үз мөмкинлекләре лимитыннан артып киткән. Хәзер ләм кырлары тулысынча файдаланудан чыгарылган.