ТР рәисе һәм Казан мэры Авиатөзелеш һәм Яңа Савин районнары хакимиятенең яңартылган бинасын карадылар

1977 елда төзелгән объектка беренче тапкыр капиталь ремонт ясалган

Бүген, Шәһәр һәм Республика көнендә, ТР рәисе Рөстәм Миңнеханов һәм Казан мэры Илсур Метшин Авиатөзелеш һәм Яңа Савин районнары администрациясе бинасына капиталь ремонт нәтиҗәләрен бәяләделәр. Алар бинада башкарылган төзелеш һәм яңарту эшләрен, эш кабинетларының җиһазландырылуын карадылар.

Авиатөзелеш һәм Яңа Савин районнары администрациясенең биш катлы бинасы Волгоград урамындагы 32 йорт адресы буенча урнашкан, объект 1977 елда төзелгән. Монда төзекләндерү беренче тапкыр үткәрелде, дип хәбәр итә ТР Рәисе матбугат хезмәте.

Бинаның мәйданы 6 мең квадрат метр тәшкил итә. Биредә лифт җиһазлары алыштырылган, халыкның аз хәрәкәтләнүче төркемнәре өчен юллар ясалган, су белән тәэмин итү, су агызу, җылылык, электр белән тәэмин итү, янгын сигнализациясе системалары яңартылган, түбә һәм фасад төзекләндерелгән. Кабинетларда яңа җиһазлар урнаштырылган. Холллар һәм коридорлар юл күрсәткечләре белән җиһазландырылган, интеллектуаль үткәрү системасы урнаштырылган.

Шунысын да билгеләп үтәргә кирәк, Авиатөзелеш һәм Яңа Савин районнары администрациясе инфраструктураның тиешле торышы, кирәкле коммуналь хезмәтләр күрсәтү һәм 178 хезмәткәр көче белән 345 мең район халкы өчен уңайлы шәһәр мохите булдыру турында кайгырта.

Администрация хезмәткәрләре 1,2 меңнән артык күпфатирлы йорт, 48 мәктәп һәм 76 мәктәпкәчә учреждение, шулай ук Авиатөзелеш һәм Яңа Савин районнарында яшәүче 44,5 меңгә якын кеше яши торган 14 торак массивның эшләвен тәэмин итә.

Яңартылган бинаны карауда ТР рәисе администрациясе җитәкчесе Әсгать Сәфәров, ТР Төзелеш, архитектура һәм ТКХ министры Марат Айзатуллин, Авиатөзелеш һәм Яңа Савин районнары администрациясе башлыгы Ренат Шәмсетдинов һәм башкалар катнашты.

Фоторепортаж

Видеорепортаж

30.08.2025 13:48

Шулай ук укыгыз

Барлык яңалыклар