Казанның «Титры» инклюзив кино мәктәбе эше «ТЭФИ-регион» конкурсының финалына чыкты

«Дебют» кыска метражлы картинасы «Иң яхшы телевизион фильм» номинациясендә билгеләнде.

Фото: Денис Гордийко

(Казан шәһәре KZN.RU, 12 нче октябрь). Казанның «Титры» инклюзив кино мәктәбе эше «ТЭФИ-регион 2022» телевизион конкурсы финалына чыкты. «Дебют» кыска метражлы картинасы «Иң яхшы телевизион фильм» номинациясендә билгеләнде.

Быел конкурста 18 номинациядә 501 эшне бәяләделәр. Финалистларның исемнәре Черкесскида узган «ТЭФИ-Регион» XXI бөтенроссия телевизион конкурсында катнашучыларны бүләкләү тантанасында игълан ителде. Ярышларның йомгаклау этабы 25 нче ноябрьдә Санкт-Петербургта узачак.

«Дебют» кыска метражлы фильмы кинематограф тарихына багышланган. Эшне булдыру өстендә 7 яшьтән алып 17 яшькә кадәрге ишетү сәләте һәм терәк-хәрәкәт аппараты функцияләре бозылган балалар һәм аларның сәламәтлек мөмкинлекләре чикләнмәгән яшьтәшләре хезмәт куйды, дип хәбәр иттеләр «Игелекле Казан» коммерциягә нигезләнмәгән автоном оешмасында.

Балалар инклюзив кино мәктәбе агымдагы елның мартында ачылды. Бушлай дәресләрдә балалар актерлык осталыгына, сәхнә теленә, пластикага һәм мимикага, сценарий осталыгына, режиссурага, оператор эшенә һәм монтаж сәнгатенә өйрәнәләр. Кино мәктәбе РФ Президенты грантын файдаланып эшли, дәресләр «Перемена» инклюзив белем бирү мөмкинлеге белән рухи һәм иҗади үсеш үзәгендә уза.

Шулай ук укыгыз

Барлык яңалыклар