Татарстан Республикасы Президенты «Заречная» канализация-насос станциясен төзү турында: «Бу башкалабыз өчен алга киткән проект, ул шәһәрнең йөзен үзгәртергә мөмкинлек бирәчәк»

Объект дәүләт экспертизасының уңай нәтиҗәсен алды – аны файдалануга кертү 4 млн кв. метрдан артык торак төзергә мөмкинлек бирәчәк.

Фото: Денис Гордийко

(Казан шәһәре KZN.RU, 24-нче февраль, Алена Мирошниченко). Төзелгән «Заречная» канализация-насос станциясе шушы көннәрдә дәүләт экспертизасының уңай бәяләмәсен алды. Татарстан Президенты Рөстәм Миңнеханов бүген Казан шәһәре Думасының Ратушадагы V хисап сессиясендә бу объектны төзү шәһәр өчен стратегик әһәмияткә ия, дип белдерде. «Бу башкалабыз өчен мөһим проект, зур һәм катлаулы. Ул шәһәрнең тышкы күренешен, аерым алганда, Киров районын һәм аның янындагы территорияне үзгәртергә мөмкинлек бирәчәк,– дип ассызыклады ТР башлыгы. – Безнең бурыч – боларның барысын да башкала халкы файдасы өчен эшләү».

Казан Мэры Илсур Метшин сессиядә хисап доклады белән чыгыш ясаганда, киләчәктә «Заречная» канализация-насос станциясен файдалануга кертү 4 млн кв. метрдан артык торак төзергә мөмкинлек бирәчәк, дип билгеләп үтте. Исегезгә төшерәбез, узган ел объектта төп төзелеш-монтаж эшләре төгәлләнде.

Үзенең чыгышында И.Метшин ассызыклап узганча, шәһәрдә эре инфраструктура объектлары төзелеше белән беррәттән, әйләнә-тирә мохитне саклау буенча проектлар гамәлгә ашырыла, халык белән аңлату эшләре алып барыла, аерым алганда, үсеп килүче буын һәм тулаем экология мәсьәләләренә аерым игътибар бирелә. Шулай итеп, Казан Россиядә халыкара стандартлар буенча калдыкларны җыю һәм эшкәртү кертеләчәк беренче шәһәр була ала. «Без чүп-чарны аерып җыю культурасын тәрбияләү эшендә зур юл уздык. Шәһәр бу эшкә әзер», – дип белдерде ул.

Казанда чүп-чарны аерып җыю һәм эшкәртү системасын кертү актив алып барыла. 2020 елда шәһәрдә калдыкларны аерып җыю өчен контейнерлар белән җиһазландырылган 200-дән артык мәйданчык төзелгән. Татарстан башкаласында 1290 шундый контейнер мәйданчыгы кулланыла – аларның гомуми саныннан 71%-ы.

И.Метшин искәрткәнчә, узган елның гыйнварында Татарстан башкаласы мәктәпләрендә сынау проекты старт алган – пластик тара һәм алюминий банкалар җыю өчен фандоматлар урнаштырылган. Шулай ук мәгариф учреждениеләрендә, барлык эре сәүдә үзәкләрендә файдаланылган батареялар өчен махсус урналар барлыкка килгән. Йортларның ишегалларында пластик җыю өчен савытлар урнаштырылган.

Моннан тыш, 2020 елда Самосырово чүплеген рекультивацияләүнең соңгы этабы тәмамланган. «Ләм кырларын эксплуатацияләүне туктату өчен, агынты су утырмаларын термо эшкәртү корылмалары төзелеше төгәлләнде, хәзер җибәрү-көйләү эшләре алып барыла. Федераль программага рекультивация проектын кертү эше дәвам итә – бүген ул дәүләт реестрына кертелгән инде», – дип хәбәр итте И.Метшин.