Р.Гафаров шәһәр яны лагерьлары турында: «Юлламаларга ихтыяҗ тәкъдимнән шактый артып китә»

Р.Гафаров шәһәр яны лагерьлары турында: «Юлламаларга ихтыяҗ тәкъдимнән шактый артып китә»

Казанда җәйге чорда шәһәр читендәге 11 сәламәтләндерү лагеренда 15 меңнән артык укучы ял итәчәк. Лагерьларны әзерләүгә 11 млн сум бүлеп бирелгән, территорияләрне капиталь ремонтлау һәм яшелләндерү эшләре башкарылган. Лагерьларны әзерләү һәм сменалар тематикасы турында эшлекле дүшәмбедә Балалар һәм яшьләр эшләре комитеты рәисе Алия Заһидуллина сөйләде.<br> <br> Казан Башкарма комитеты җитәкчесе Рөстәм Гафаров билгеләп үткәнчә, лагерьларга капиталь ремонт ясалганнан соң, анда ял итүгә ихтыяҗ арта.<br> <br> «Соңгы елларда без лагерьларның куркынычсызлыгын сизелерлек яхшырттык: кирәкле җиһазлар сатып алдык һәм лагерь хезмәткәрләрен өйрәттек. Шулай ук уңайлылыкны арттыру өчен күп эшләнде. Кызганычка каршы, һәр лагерьны төзекләндерү озак вакытна ала. Иске биналарны тулысынча яңадан төзергә туры килә — бу җитди төзелеш. Яңа биналарны ел әйләнәсе файдалану өчен җылытыла торган итәргә тырышабыз. Бу яхшырулардан соң балаларны лагерьга җибәрергә теләүчеләр саны кискен артты. Өстәвенә, шәһәрдә балалар саны да артты. Нәтиҗәдә хәзер юлламаларга ихтыяҗ тәкъдимнән шактый артып китә. Бу безне яңа муниципаль лагерьлар төзү турында уйланырга мәҗбүр итә, гәрчә бүген бу катлаулы бурыч булып тоелса да», — диде шәһәр Башкарма комитеты җитәкчесе Рөстәм Гафаров һәм яңа лагерьлар төзү өчен урыннар эзләү белән шөгыльләнергә кушты.<br> <h3>МХОда катнашучыларның балалары лагерьларда бушлай ял итәчәк</h3> Алия Заһидуллина 2025 елның җәйге чорында Казанда 15 меңнән артык укучы өчен ял оештырылуы турында сөйләде. Быел муниципаль заказ кысаларында 11 муниципаль лагерь һәм 16 предприятие һәм оешма лагерьлары эшләячәк. «Нармонка» лагере капиталь ремонт өчен ябык, ә «Татарстан пионериясе» лагере төзекләндерүгә чиратта тора.<br> <br> Ул шулай ук лагерьларны әзерләү һәм ремонтлауга 11 млн сум акча бүлеп бирелүен, ә «Ял» үзәгенең бюджеттан тыш эшчәнлеге нәтиҗәсендә 21,5 млн сумлык эш башкарылуын билгеләп үтте. «Заречье», «Восток» һәм Ю.А.Гагарин исемендәге лагерьларда 234 агач утыртылды, бу соңгы елларда иң зур күләмле агач утырту булды, дип хәбәр итте Алия Заһидуллина.<br> <br> Ял оештыруда авыр тормыш хәлләрендәге балаларга, шул исәптән мөмкинлекләре чикләнгән, ата-ана каравыннан мәхрүм калган балаларга һәм МХОда катнашучы балаларга аерым игътибар бирелә. Алар өчен бушлай юлламалар каралган — 1,6 меңнән артык кешене колачлау планлаштырыла. Юлламалар алуга гаризаларны ата-аналар 7 апрельдән бирә башлаганнар. «Гаризалар эшкәртелгәннән соң, сайтта сменага үткәннәрнең исемлеге бастырыла», – дип өстәде балалар һәм яшьләр эшләре буенча комитет рәисе.<br> <br> Бюджет урыннарыннан тыш, субсидияләү белән коммерция лагерьларына юлламалар да бар, аларның бәясе сменага 28 мең сумнан башлана. Гадәттәгечә «Ял» лагерьларына юлламаларның күп өлеше оешкан төркемнәргә, шул исәптән яшь спортчыларга һәм шәһәрнең иҗат төркемнәренә бирелә.<br> <br> «Ял» үзәге лагерьларына юлламалар бәясе арзан кала — 18 көнлек смена өчен 14-17 мең сум. Юлламалар саны узган ел дәрәҗәсендә калды — 970 данә («Нармонка» лагерен төзекләндерүгә һәм дәүләтнең аерым кайгыртуын таләп итүче балалар өчен юлламалар артуга карамастан). Алия Заһидулина урыннар җитмәвен билгеләп үтте.<br> <br> Лагерьларның эшләре 30 августка кадәр алып барылачак, беренче узышлар инде 31 майга планлаштырылган.<br> <h3>«Казан, мин хәтерлим, мин горурланам!» — лагерь сменаларының гомуми тематикасы</h3> Бөек Ватан сугышында Җиңүнең 80 еллыгы уңаеннан «Ял» үзәге лагерьларында барлык сменалар «Казан, мин хәтерлим, мин горурланам!» темасы белән бәйле булачак. Һәр смена Казан урамнары исемнәрендә исемнәре мәңгеләштерелгән сугыш геройларына багышланачак.<br> <br> «Аркадий Гайдар» сменасы вакытында «Тарих объективта» балалар сугыш тарихын хәрби корреспондент призмасы аша тикшерәчәкләр. Балаларга үз медиапроектларын булдыру, фото һәм видео төшерү буенча мастер-классларда катнашу мөмкинлеге булачак, шулай ук режиссура нигезләре буенча мастер-класслар һәм башкалар планлаштырылган. «Муса Җәлил. Үткән юллар» сменасы тулысынча татар телендә узачак һәм шагыйрь һәм хәрби журналист Муса Җәлил иҗатына багышланачак. «Семен Коновалов. Җирне саклаучылар» сменасында «Юнитур» лагеренда Семен Коноваловның оныгы Александр Коновалов катнашачак, аның әтисе хәзер МХО уздыру зонасында, дип билгеләп үтә Алия Заһидуллина. <h3> Иң яхшы әйдәүчеләр</h3> Алия Заһидуллина билгеләп үткәнчә, «Ял» үзәге җитәкчеләре янә «Инкубатор» республика конкурсында җиңү яулаган. Моннан тыш, быел белем алучы әйдәүчеләр саны студентларның хезмәт отрядлары белән хезмәттәшлек нәтиҗәсендә ике тапкырга артты.<br> <br> Шулай ук әйдәүче ярдәмчеләрен эшкә урнаштыру проекты дәвам итәчәк: 14-17 яшьлек 30 яшүсмерне эшкә урнаштыру планлаштырыла, 18 көнлек сменага 8,5 меңнән 11 мең сумга кадәр хезмәт хакы түләнә.<br> <br> «Балалар лагерьларында җәйге сәламәтләндерү кампаниясе — чын маҗара, ул шатлык һәм яңа танышулар бүләк итәчәк», – дип йомгаклады комитет рәисе.<br>

2025-05-19T12:57:07+0300