Р.Гафаров: «Елның салкын вакытында яшәүчеләрнең уңайлылыгы безнең хәзер никадәр яхшы әзерләнүебезгә бәйле»

Җылыту сезонына 2092 КФЙ әзерләнгән инде — бу үзәк җылытуда булган йортларның гомуми санының 38% ы

Казанда җылыту сезонына 2092 йорт яисә үзәк җылыту белән тәэмин ителгән йортларның 38% ы әзер. Кышка әзерлек чаралары турында бүген эшлекле дүшәмбедә шәһәр Башкарма комитеты җитәкчесе урынбасары Искәндәр Гыйниятуллин сөйләде.

«Җәй — кызу вакыт, җәй уртасы – кышка һәм, барыннан да элек, җылыту сезонына әзерләнү өчен иң яхшы вакыт. Елның салкын вакытында яшәүчеләрнең уңайлылыгы безнең хәзер никадәр яхшы әзерләнүебезгә бәйле», — диде шәһәр Башкарма комитеты җитәкчесе Рөстәм Гафаров.

Быел объектларны җылыту сезонына әзерләү яңа кагыйдәләр буенча алып барыла. Моннан соң җылылык белән тәэмин итү һәм җылылык челтәре оешмаларының гына түгел, ә җылылык кулланучыларның да – торак йортлардан алып социаль объектларга кадәр — әзерлеге бәяләнә. Ә кышка әзерлек паспортын алу кагыйдәләре шактый катгыйланды. Җылылык бирү яисә куллану өчен җаваплы һәр оешма махсус комиссиягә җылылык белән тәэмин итүчеләр өчен 29 пунктка кадәр, кулланучылар өчен 19 пунктка кадәр документлар тапшырырга тиеш. Шушы мәгълүматлар нигезендә комиссия ун көн дәвамында бәяләү кәгазьләрен җентекләп тикшерә һәм һәр объектның әзерлек дәрәҗәсен исәпләп чыгара. Тикшерү нәтиҗәләре буенча рәсми акт һәм әзерлек паспорты бирелә.

Шулай итеп, кышка әзерлек буенча шәһәр штабына 16 меңнән артык объектның әзерлегенә бәя бирергә туры киләчәк. Бу сан 6003 күпфатирлы йортны үз эченә ала, шулар арасында 5560 йорт – үзәк, ә 443 шәхси җылытуга ия.

Җылылык белән тәэмин итү объектларының, йортларның үзәк җылыту системаларының һәм социаль өлкә объектларының техник әзерлеге 1 сентябрьгә тәэмин ителергә, 15 сентябрьгә шәһәрдәге торак йортларның әзерлек паспортлары рәсмиләштерелергә тиеш.

«Безнең игътибар үзәгендә, һәрвакыттагыча, социаль объектлар һәм күпфатирлы йортлар тора, аларның саны 6 меңнән артык. Бу йортларның һәрберсендә безнең гражданнар яши, шуңа күрә бездән югары дәрәҗәдәге җаваплылык, эштә актив катнашу һәм, барыннан да элек, оста ысул таләп ителә», – дип билгеләп үтте Башкарма комитет җитәкчесе.

Бүгенге көнгә үзәк җылытуда булган 5560 йортның 2092 йорты ягъни 38% ы җылылык кабул итүгә әзер. Авиатөзелеш һәм Яңа Савин районнарында эшләр 41% ка, Вахитов-Идел буе районнарында 34,5% ка, Киров һәм Мәскәү районнарында 25,7% ка, ә Совет районнарында 48,2% ка тәмамланган.

«Безнең алда торган бурычлар аңлашыла. Казан билгеләнгән вакыт эчендә киләсе җылыту чорын авариясез узу өчен барлык кирәкле чараларны үтәячәк», – дип ассызыклады Искәндәр Гыйниятуллин.