Мебель сатып алырга теләп, казанлылар 30 мең сумнан артык акча югалткан

Хатын-кызлар сату турындагы игъланнарны интернетта тапкан.

Фото: Денис Гордийко

(Казан шәһәре KZN.RU, 9 нчы февраль). Интернеттан җиһаз сатып алу теләге аркасында Казанда яшәүче ике хатын-кыз финанс югалтуларга дучар булган. Алар мошенникларның хәйләләренә эләккән һәм 31 мең сум акчаларын югалткан.

6 нчы февральдә «Гвардия» полиция бүлегенә мошенниклык факты буенча гариза килә. Зыян күрүче сүзләренчә, бушлай игъланнар сайтында ул мебель сату турында тәкъдим тапкан. Күрсәтелгән номер буенча шалтыратып, хатын килешү шартлары һәм китерү турында сөйләшә. «Сатучы» Казанда яшәүче хатынны банк картасына 25 мең сум акча күчерергә ышандыра, аннары үзе элемтәгә чыгудан туктый һәм белдерүне алып ата.

Шундый ук очракны «Сафиуллина» полиция бүлеге хезмәткәрләре дә теркәгән. Йокы бүлмәсенә җиһаз сатып алам дип, зыян күрүче 6 мең сумын югалткан.

Ике факт буенча да РФ Җинаять кодексының 159 нчы маддәсе буенча «Мошенниклык» җинаять эшләре кузгатылган. Полицейскийлар җинаятьчеләрне эзли, дип хәбәр итә Россия Эчке эшләр министрлыгының Казан буенча идарәсе матбугат хезмәте.

Халыкны интернетта сатып алганда игътибарлы булырга чакыралар. Аферистларның хәйләләренә эләкмәс өчен, товарга карамыйча гына сатып алырга ярамый.

Шулай ук укыгыз

Барлык яңалыклар