БДИ үткәрү 8 июньнән соңрак вакытка күчерелде

Мондый карар илдәге эпидемиологик вәзгыять белән бәйле.

(Казан шәһәре KZN.RU, 13-нче май). 2020 елда бердәм дәүләт имтиханын үткәрү сроклары 8-нче июньнән соңрак вакытка күчереләчәк. Бу хакта Россия мәгариф министры урынбасары Виктор Басюк видеоконференцэлемтә режимында узган төбәкләр белән киңәшмәдә хәбәр итте. Аның сүзләренчә, мондый карар илдәге эпидемиологик вәзгыять белән бәйле.

Аттестация кампаниясен уздыруның ахыргы даталары якын арада игълан ителәчәк. Барлык сроклар да ил Хөкүмәте тарафыннан расланачак һәм РФ Дәүләт Думасы һәм Федерация Советы тарафыннан якын көннәрдә беркетеләчәк.

11 сыйныфларда БДИ үткәрү форматына төзәтмәләр кертеләчәк: югары уку йортларына керергә җыенмаган укучыларга аттестатка ел нәтиҗәләре буенча тамга куелырга мөмкин. 9 сыйныф укучылары өчен рус теле һәм математика буенча мәҗбүри имтиханнарны гамәлдән чыгару планлаштырыла, йомгаклау билгеләре еллык нәтиҗәләр нигезендә чыгарылачак.

Имтихан бирү кампаниясе Кулланучылар хокукларын яклау һәм кеше иминлеге өлкәсендә күзәтчелек федераль хезмәтенең санитария-гигиена режимына таләпләре нигезендә бердәм вакытта узачак: аудиториядә укучылар саны кимиячәк, бүлмәләр дезинфекциясе уздырылачак. Төбәкләр катнашучыларның һәм имтихан алучыларның сәламәтлеген яклау буенча тулы исемлеге булган җентекле киңәшләр алачак, дип хәбәр итә ТР Мәгариф һәм фән министрлыгы матбугат хезмәте.

Шулай ук укыгыз

Барлык яңалыклар