Мәгърифәтчелеккә нигезләнгән әңгәмәләр һәм язучылар белән очрашулар: Казанда Православие китабы фестивале старт алды

Ул 16 нчы мартка кадәр дәвам итәчәк

Фото: Казан епархиясе матбугат хезмәте

Казанда Православие китабы фестивале башланды, ул 16 нчы мартка кадәр дәвам итәчәк. Чара кысаларында катнашучылар өчен китап күргәзмә-ярминкәсе, руханилар белән әңгәмәләр һәм лекцияләр, Мәскәүдән, Санкт-Петербург, Екатеринбург, Саратовтан килгән православие язучылары белән очрашулар, шулай ук балалар өчен мастер-класслар оештырылачак.

Әйтик, бүген теләге булган һәркем Казан епархиясе музеенда язучы Ольга Клюкина белән очраша ала, ул тыңлаучыларны православие балалар әдәбияты дөньясы белән таныштырачак. Шәһәрлеләрне 19:00 сәгатьтә Большая Красная урамы, 5 йорт адресы буенча көтәчәкләр.

Монда ук 10 нчы мартта 8-12 яшьлек балалар өчен «Иконалар язучыда кунакта» мастер-классы узачак. Чара 12:00 сәгатьтә башлана.

14 нче мартта 13:00 сәгатьтә «Россия – минем тарихым» тарихи паркында православие китаплары күргәзмә-ярминкәсе ачылачак. Кунакларны Оренбург тракты, 8 йорт (1 нче павильон) адресы буенча көтәчәкләр.

Ә 17:00 сәгатьтә «Ни өчен без чиркәү тарихын өйрәнәбез?» дигән лекция планлаштырылган. Аны Казан руханилар семинариясенең гомуми һәм чиркәү тарихы кафедрасы мөдире, чиркәү тарихы докторы протоиерей Алексий Колчерин үткәрәчәк.

Барлык чараларга да керү ирекле. Тулы программа белән сылтама буенча танышырга мөмкин.

Фестиваль ел саен 14 нче мартта билгеләп үтелә торган Православие китабы көненә багышланган, дип хәбәр ителә Татарстан митрополиясе сайтында.

Шулай ук укыгыз

Барлык яңалыклар