Казанда Җиңү көнен бәйрәм итү программасы 130 га якын чараны үз эченә ала

Казанда Җиңү көнен бәйрәм итү программасы 130 га якын чараны үз эченә ала

<p> Казанда Бөек Ватан сугышында Җиңүнең 79 еллыгына багышланган 130 га якын чара узачак. Район администрацияләре вәкилләре ветераннарга Татарстан рәисе һәм шәһәр мэры исеменнән азык-төлек җыелмалары һәм открыткалар тапшырачак. </p> <p> Ветераннарны диспансерлаштыру 25 нче апрельгә төгәлләнә. Табиблар күрсәтмәләре буенча аларны ишетү аппаратлары белән тәэмин итәчәкләр, теш протезлары куячаклар, шулай ук, кирәк булганда, чираттан тыш офтальмологик операцияләр ясалачак. </p> <p> Быел Җиңү көне уңаеннан Казанның һәр районында ветераннар өчен концертлар һәм «Җиңү вальсы» флешмобы планлаштырылган. Ветераннар яшәгән ишегалларында агитбригадалар чыгыш ясаячак. </p> <p> «Ветеран йорты янында парад» акциясе кысаларында 8 нче майда шәһәр районнары буйлап тарихи хәрби техника йөреше оештырылачак. Юлда автоколонна Бөек Ватан сугышы ветераннары йортлары янында тукталачак, ә акциядә катнашучылар аларны Җиңү көне белән котлаячак. Шул көнне бөтен республика ветераннарын Муса Җәлил исемендәге опера һәм балет театрында тантаналы чарага җыялар. </p> <p> Казанда Җиңү көненә митинглар, концертлар, акцияләр, спорт ярышлары, күргәзмәләр, конкурслар һәм сыйныф сәгатьләре багышланачак. 25 нче апрельдән шәһәр районнарында истәлек-мемориаль чаралар узачак. 1 нче майда «Казан – хезмәт батырлыгы шәһәре» стеласына чәчәкләр салыначак. 7 нче майда – Сәетгалиев исемендәге мәдәният йорты янындагы паркта урнашкан һәлак булган сугышчылар һәйкәле каршында, 8 нче майда «Блокадалы Ленинградта яшәүчеләргә» һәйкәле каршында зур тантаналы митинглар планлаштырылган. </p> <p> Быел Казанда «Ишегалдында җырлыйбыз» һәм «Җиңү тәрәзәләре» акцияләре дәвам итәчәк. Шәһәр традицион рәвештә «Хәтер бакчасы» һәм «Җиңү диктанты» халыкара чараларына кушылачак. </p> <p> 29-30 нчы апрельдә «Патриот» үзәгендә балалар һәм яшьләр арасында спортның хәрби-гамәли төрләре буенча «Җиңүгә тигезләнү» спартакиадасы узачак. Ә 30 нчы апрельдән 10 нчы майга кадәр Казанда «Җиңү варислары» хәрби-спорт җыены оештырылачак. Аны ачу тантанасы 1 Май мәйданында үтәчәк. </p> <p> Бүгенге көндә ТР башкаласында барлыгы 3230 ветеран: инвалидлар, тыл хезмәтчәннәре һәм толлар яши, шуларның 172 се – сугышта катнашучылар. </p> <br>

2024-04-22T08:58:00+0300