II Бөтенроссия балалар экология форумында Казан халкы командасы проекты иң яхшысы дип табылды

Инициатива агачлар утырту һәм өмәләр уздыруны да кертеп, төрле чаралар оештыруны күз уңында тота

II Бөтенроссия балалар экология форумында Казан халкы командасы беренче урынны яулады. Мәктәп укучылары һәм студентлар инициативасы «Эко гадәтләрне формалаштыру буенча иң яхшы проект» номинациясендә җиңде. Команда программаны гамәлгә ашыру өчен акчалата бүләк алачак.

«Һәр йортка экологик гадәтләр» проекты чаралар сериясен күздә тота – аларны уку елы дәвамында үткәрәчәкләр. Марафонда 7-10, 11-14 яшьлек укучылар һәм ата-аналар катнаша ала. Проект берничә этаптан тора. Беренчесендә инициатив төркемнәр оештырылачак, алар белән конкрет чаралар турында фикер алышачаклар. Алга таба катнашучылар акцияләрдә һәм мәгърифәтчелек чараларында катнашканда конкрет гадәтләр формалаштырачаклар. Йомгаклау этабында нәтиҗәләр ясалачак. Вакыйгалар форматы арасында ата-аналар һәм экспертлар белән тематик очрашулар, агач утырту, өмәләр үткәрү һ. б. каралган.

Инициативаны 7, 28, 93, 126, 183 нче гимназия, 86 нчы һәм 111 нче мәктәпләр, 185 нче һәм 187 нче лицейлар, Совет районының инженерлык үзәге лицее укучылары, Казан мәгълүмати технологияләр һәм элемтә техникумы студенты тәкъдим итте. Шул ук номинациядә «Җир балалары» проекты өчен икенче урынны Волгоград өлкәсе командасы алды. Бакыр «Экологик гадәтләр планетаны коткарачак» проекты өчен Белгород өлкәсе коллективына эләкте.

Конкурста җиңүчеләр һәм призерлар 18 номинация буенча билгеләнде. Быел форум ике этапта узды. Беренчесендә – онлайн режимда Россиянең барлык төбәкләреннән командалар катнашты. Очрашу этабы Чиләбедә илнең 51 субъектыннан командалар катнашында узды, дип хәбәр иттеләр ТР Мәгариф һәм фән министрлыгында.

Бөтенроссия балалар экология форумы «Компас» экология инициативаларын үстерү һәм яклау фонды һәм Чиләбе өлкәсе экология министрлыгы тарафыннан оештырылды.

Шулай ук укыгыз

Барлык яңалыклар