Казан шәһәре Думасы депутатлары җирдән файдалануның һәм төзелешнең яңа кагыйдәләре проектын карады

Казан Башкарма комитетында шәһәр төзелеше һәм торак-коммуналь хуҗалык буенча даими комиссиянең киңәйтелгән утырышы узды.

Фото: Марат Мугинов

(Казан шәһәре KZN.RU, 9-нчы август, Камилә Гобәйдуллина). Бүген Татарстан башкаласының Башкарма комитетында Казан шәһәр Думасының шәһәр төзелеше һәм торак-коммуналь хуҗалык буенча даими комиссиясенең киңәйтелгән утырышы узды. Анда депутатлар, шулай ук шәһәр хакимиятенең структур бүлекчәләре вәкилләре катнашты. Очрашуны даими комиссия рәисе Эмиль Хөснетдинов үткәрде.

Казанның баш архитекторы урынбасары Тимур Кадыйров депутатларга җирдән файдалану һәм шәһәр төзелешенең яңа кагыйдәләре турында сөйләде. «Җирдән файдалануның һәм төзелешнең яңа кагыйдәләре проекты (ПЗЗ) – Казанның актуаль шәһәр төзелеше документларын әзерләүнең комплекслы эшләренең состав өлеше. Эш муниципаль контрактны үтәүнең соңгы этабы булып тора, аны Мәскәү Генпланы институты башкара. Эшләр составына шулай ук 2018 елда расланган шәһәр төзелешен проектлауның җирле нормативларын эшләү, 2020 елда расланган Генераль планны эшләү керде», – дип билгеләде ул. Спикер кагыйдәләр өстендә эш Генпланны эшләү белән параллель рәвештә алып барылуын өстәде, әмма эшләп бетерүнең иң интенсив стадиясе аны раслаганнан соң гына башланган булырга мөмкин.

Җирдән файдалануның һәм төзелешнең яңа кагыйдәләре проекты раслауга кадәрге барлык кирәкле этапларны узды. Шуларның берсе, Т.Кадыйров сүзләренчә, 2 айга якын дәвам иткән иҗтимагый фикер алышулар. Белгечләр адресына аларда катнашучылардан 87 сорау, 447 кисәтү һәм тәкъдимнәр килде. «Барлык тәкъдимнәрнең җентекле анализлары нәтиҗәләре буенча аларның кайберләре исәпкә алырга тәкъдим ителде. Фикер алышулардан соң, һәр кисәтү буенча соңгы карар кабул итү өчен, төзелешнең яңа кагыйдәләре проектын әзерләү комиссиясенең 3 утырышы уздырылды. Йомгаклау комиссиясе 24-нче июньдә узды», – дип сөйләде спикер.

Т.Кадыйров билгеләп үткәнчә, төзелешнең яңа кагыйдәләре проектында территориаль зоналарның составы һәм чикләре шактый эшкәртелде. Зоналарның саны артты: алар 19 иде, 27 булды. Шулай ук шәһәр төзелешен җайга салуның яңа механизмы барлыкка килде – территориаль зоналарның ярдәмче зоналары. «Төзелешнең кагыйдәләренең яңа редакциясенең иң мөһим яңалыкларының берсе булып торак объектларына гына түгел, ә барлык рөхсәт ителгән куллану төрләренә килештерелгән параметрлар урнаштыру тора. Моннан тыш, чикле параметрлар исемлеге үзе дә шактый киңәйтелгән», – дип өстәде ул.

Казан шәһәре Думасы депутаты Людмила Андреева зоналарны яңа проектлауны территорияләре ике зонада булган йортлар белән проблеманы хәл итәчәкме, дип кызыксынды. Аның сүзләренчә, элегрәк бу мәсьәлә Казан шәһәр Думасына мөрәҗәгать итү аша хәл ителгән һәм яшәүчеләргә уңайсызлыклар китергән. Т.Кадыйров депутатларга бүтән мөрәҗәгать итәргә туры килмәячәк, проблема автомат рәвештә хәл ителәчәк, дип җавап бирде. Депутатлардан шәһәр төзелешен проектлау кагыйдәләре һәм механизмнарын гамәлгә ашыру тәртибенә бәйле башка оештыру мәсьәләләре дә кабул ителде.

Шулай ук утырышта «Казан шәһәр округының генераль планын раслау турында» һәм «Торак урын мәйданының хисап нормасы һәм килешү буенча торак урын мәйданын бирү нормасы турында» Казан шәһәре Думасы карарына үзгәрешләр кертү мәсьәләләре каралды. Депутатлар комиссия утырышының көн тәртибенә кертелгән барлык мәсьәләләрен Казан шәһәре Думасының чираттагы сессиясендә карарга тәкъдим иттеләр.