Казанда коронавирустан прививканы троллейбус, трамвай йөртүчеләргә һәм кондукторларга ясаячаклар

ТР сәламәтлек саклау министрлыгы моның өчен COVID-19дан 500 доза вакцина биргән.

Фото: Казан шәһәре KZN.RU

(Казан шәһәре KZN.RU, 3-нче февраль). Иртәгәдән Казанда җәмәгать электр транспорты хезмәткәрләренең коронавирустан ирекле вакцинация куйдыруы башлана. Татарстан Сәламәтлек саклау министрлыгы «Метроэлектротранс» муниципаль унитар предприятиесе хезмәткәрләре өчен беренче 500 доза вакцина бирде.

Вакцинация депоның медицина кабинетында үткәреләчәк. Хәзер предприятиедә прививка куйдырырга теләге булган хезмәткәрләр исемлеген төзиләр.

Шунысын да билгеләп үтәргә кирәк, 2020 елда пассажирлар электр транспортында 50 миллионнан артык тапкыр йөргән. Йөртүче-кондукторлар составы югары куркыныч зонасында, шуңа күрә предприятиедә прививка ясау кампаниясен оештыру турында карар кабул ителгән, дип хәбәр итә «Метроэлектротранс» муниципаль унитар предприятиесе. Моның өчен барлык шартлар да тудырылган: хезмәткәрләргә вакцинациягә язылырга һәм поликлиникаларда чират көтәргә кирәкми, ә эш урынында прививка ясатырга була.

Бу атнада 500 хезмәткәрне вакцинацияләү планлаштырыла. Киләсе атнада өстәмә вакцина партиясе килүе көтелә. Икенче этапта метрополитен хезмәткәрләренә вакцинация ясалачак.

Шулай ук укыгыз

Барлык яңалыклар