«Казань против коррупции! – Казан коррупциягә каршы!» конкурсына эшләр 15 нче ноябрьгә кадәр кабул ителә

Җиңүчеләргә акчалата бүләкләр тапшырылачак

Фото: Денис Гордийко

(Казан шәһәре KZN.RU, 22 нче сентябрь). ТР башкаласында яшәүчеләр «Казань против коррупции! – Казан коррупциягә каршы!» иҗади эшләр бәйгесенә кушыла алалар. Ярыш өч номинациядә узачак. Җиңүчеләрне акчалата бүләкләр көтә.

Мәктәп укучылары һәм 14 яшьтән 35 яшькә кадәрге студентлар катнаша ала.

Конкурс өч этапта узачак. Беренче этап – гаризалар кабул итү – 15 нче ноябрьгә кадәр дәвам итәчәк. Эшләр түбәндәге номинацияләрдә кабул ителә: «Коррупциягә каршы чараның иң яхшы проекты», «Коррупциягә каршы юнәлештәге иң яхшы видео» һәм «Коррупциягә каршы тематикага иң яхшы график плакат».

Материалларны anticorr.kzn@gmail.com электрон почтасына җибәрергә мөмкин (файлны йөкләү өчен сылтаманы күрсәтергә кирәк) яки шәхсән Кремль урамы, 1 (622 каб.) адресы буенча китерергә була. Әлеге адреска эшләрне почта аша да җибәрергә рөхсәт ителә. Эшләр идеянең креативлыгы һәм яңалыгы, эчтәлекне ачу тирәнлеге, башкару сыйфаты һ.б. критерийлар буенча бәяләнәчәк. Икенче этапта 22 нче ноябрьнең 11:00 сәгатеннән 29 нчы ноябрьнең 11:00 сәгатенә кадәр ачык онлайн-тавыш бирү узачак. Соңгы этап 9 нчы декабрьгә кадәр тәмамланачак.

Эш таләпләрен конкурсның нигезләмәсеннән карарга мөмкин.

«Коррупциягә каршы чараның иң яхшы проекты» номинациясендә җиңүче – 11 мең сум, икенче урын өчен – 8 мең сум, өченче урын өчен – 6 мең сум һәм лауреат кызыксындыру бүләге буларак 2 мең сум акча алачак.

Иң яхшы видео өчен җиңүче – 14 мең сум, икенче урын өчен – 10 мең сум, өченче урын өчен 7 мең сум алачак. Шулай ук ике лауреатка кызыксындыру бүләге буларак өч мең сум бирелә.

«Коррупциягә каршы тематикага иң яхшы график плакат» номинациясендә беренче урын өчен катнашучы – 8 мең сум, икенче урын өчен – 7 мең сум, өченче урын өчен 5 мең сум алачак. Өч лауреат кызыксындыру бүләге буларак 2 мең сум алачак.

Бүләкләү датасы һәм урыны турында соңрак билгеле булачак.

Шулай ук укыгыз

Барлык яңалыклар