Эш эзләгәндә Казанда яшәүче ханым, мошенниклар белән элемтәгә кереп, 440 мең сумнан артык акчасын югалткан

Алдакчылар зыян күрүчегә вакансия һәм түләүле укулар тәкъдим иткән.

Фото: Денис Гордийко

(Казан шәһәре KZN.RU, 14 нче декабрь). Татарстан башкаласында яшәүче ханым мошенникларга ышанган һәм 440 мең сумнан артык акчасын югалткан.

Узган атнада зыян күрүчегә таныш булмаган кеше шалтыраткан. Әңгәмәдәш аның резюмесын күргәнен һәм эш урыны тәкъдим итә алуын җиткергән. Казанда яшәүче ханым укулар өчен түләргә ризалыгын белдергән. Акчасын күчергән һәм җибәрелгән сылтама буенча күчкән, ләкин вакансиянең биржа белән бәйле булуын аңлаган.

Ханым «эш бирүче» белән элемтәгә кергән, башка тәкъдимнәр белән кызыксынган һәм уку өчен җибәрелгән акчаны кире кайтаруны сораган. Мошенник акчалар банк счетына кайтарылачак дип ышандырган. Тик акчалар кире кайтарылмаган, ә мошенник элемтәгә чыгудан туктаган.

Соңрак зыян күрүче үзенең хисабын тикшергән һәм барлык акчалары билгесез счетка җибәрелгәнен күргән. Зыян суммасы 440 мең сумнан артып киткән.

«Азино-2» полиция бүлегендә РФ Җинаять кодексының 159 нчы маддәсенең 3 нче өлеше буенча «Мошенниклык» җинаять эше кузгатылган, дип хәбәр итә Россия Эчке эшләр министрлыгының Казан буенча идарәсе матбугат хезмәте.

Шулай ук укыгыз

Барлык яңалыклар