Татарстан Президенты республика учреждениеләрендә эпидемиологиягә каршы чараларны оештыруны контрольдә тотуны көчәйтергә кушты

Соңгы көннәрдә Татарстанда COVID-19 белән авыручылар санының артуы күзәтелә.

Фото: Денис Гордийко

(Казан шәһәре KZN.RU, 10-нчы октябрь). Бүген Татарстан Республикасы Президенты Рөстәм Миңнеханов Татарстан Республикасы Хөкүмәте Йортында узган республика киңәшмәсендә шәһәр һәп район башлыкларына, предприятиеләр һәм оешмалар җитәкчеләренә, тәртип саклау органнарына, Кулланучылар хокукларын яклау һәм кеше иминлеге өлкәсендә күзәтчелек федераль хезмәтенә мәгариф, сәламәтлек саклау, мәдәният, спорт һәм яшьләр сәясәте учреждениеләрендә эпидемиологиягә каршы чараларны оештыруны көчәйтүне йөкләде.

Р.Миңнеханов билгеләгәнчә, соңгы вакытта COVID-19 белән авыручылар санының артуы күзәтелә: узган атнада үсеш темплары 0,3% булса, хәзер - 0,4%. Көн саен 30-35 очрак теркәлә. Бүгенге көндә республикада коронавирус инфекциясе белән авыруның 7 мең 515 очрагы теркәлгән, 6 мең 362 кеше сәламәтләнгән. Барлыгы 85 кеше үлгән.

«Без вәзгыятьнең катлаулана баруын күрәбез. Белгечләр билгеләп үткәнчә, авырулар саны кешеләрнең тынычлануы һәм профилактика чараларын үтәмәве аркасында арта бара, - дип билгеләде республика башлыгы. - Яңа чикләү режимнарын яңадан кертүебезне теләмәс идем. Моның өчен безгә санитар-эпидемиологик чараларны төгәл үтәргә кирәк: социаль дистанция, битлек киеп йөрү, кул гигиенасы, гриппка каршы вакцинация һәм ОРВИ симптомнары барлыкка килгәндә үзизоляция».

Эчке эшләр органнары тарафыннан билгеләнгән профилактика чараларының үтәлешен тикшереп тору буенча зур эш башкарыла. Бу атнада Эчке эшләр министрлыгы хезмәткәрләре 16 районда эшләрнең торышын тикшерде. Урыннарда җирле үзидарә органнары хезмәткәрләре арасыннан 100-гә якын төркем булдырылган, дип билгеләнгән. Әлеге төркемнәр катнашында агымдагы атнада 1 мең 685 объект тикшерелгән. «Мондый төркемнәр бөтен җирдә дә оештырылырга тиеш», - дип ассызыклады Татарстан Президенты.

Эчке эшләр министрлыгы зур күләмдә хокук бозуларны ачыклауны дәвам итә. Р.Миңнеханов барлык тикшерелгән муниципаль берәмлекләрдә диярлек гражданнар һәм җаваплы вазифаи затлар тарафыннан аерым хокук бозулар ачыклануга игътибар итте, дип хәбәр итә ТР Президенты матбугат хезмәте.

Татарстан Республикасы Сәламәтлек саклау министрлыгы җитәкчелегенә мөрәҗәгать итеп, Р.Миңнеханов ятак фонды резервын даими мониторинглауны алып барырга, дару препаратлары, шәхси саклану чаралары һәм диагностика тестлары запасын тәэмин итәргә, шулай ук гриппка каршы вакцинацияне дәвам итәргә чакырды. «Моннан тыш, планлы медицина ярдәме күрсәтүне дәвам итәргә кирәк. Кешеләр кирәкле медицина ярдәмен алырга тиеш», - диде Татарстан Президенты.

Шулай ук укыгыз

Барлык яңалыклар