Бердәм тавыш бирү көнендә «Ак Барс Арена» янында узган бәйрәм чараларында 30 мең кеше булды

Кичке концертны карарга шәһәрнең 12 мең кешесе килде.

(Казан шәһәре KZN.RU, 14-нче сентябрь). 13-нче сентябрьдә, ТР Президентын һәм Казан шәһәр думасы депутатларын сайлауларда - Бердәм тавыш бирү көнендә 30 мең кеше «Ак Барс Арена» стадионы янында оештырылган бәйрәм чараларында булды. Россия эстрадасы йолдызлары катнашында узган кичке концертка шәһәрнең 12 мең кешесе килде, дип хәбәр иттеләр Балалар һәм яшьләр эшләре комитетында.

Исегезгә төшерәбез, 11-нче сентябрьдән 13-нче сентябрьгә кадәр тавыш биргән һәр кешегә «Ак Барс Арена» янындагы якшәмбе интерактив программасына «Я проголосовал!/Мин тавыш бирдем!» дигән махсус беләзек рәвешендәге чакыру билеты тапшырылды.

Бәйрәм 12.00 сәгатьтә башланды. Территория берничә тематик участокка бүленгән иде, алар иң күренекле республика һәм шәһәр проектларын тәкъдим иттеләр, аерым алганда, «Әдәби ишегалды» һәм «Тормышны яратучылар» проектлары. Бәйрәм кунаклары өчен спорт мәйданчыклары әзерләнгән иде, ә теләге булган һәркем «ГТО» Бөтенроссия физкультура-спорт комплексының тест сынауларын уза һәм «Яшел фитнес» проектыннан активлыкларда катнаша алды. Бәйрәмдә шулай ук спорт мәктәпләре дә тәкъдим ителде, һәм ата-аналар балаларын яңа уку елында дәресләргә яздыра алдылар.

Моннан тыш, музыка караоке-мәйданчыгы, киберспорт һәм виртуаль чынбарлык зонасы эшләде.

Концерт бәйрәмнең кульминациясе булды. Сәхнәдә популяр Россия һәм татар башкаручылары: Әнвәр Нургалиев, Гүзәл Уразова, DABRO төркеме, Клава Кока, Нюша, Салават Фәтхетдинов, Валерия һәм «Турецкий хоры» чыгыш ясады. Бәйрәм салют белән тәмамланды.

Шулай ук укыгыз

Барлык яңалыклар