Ләм катламнарыннан чистартканнан соң Марьино күленең күләме 1,5 тапкырга артачак

Сулык төбеннән 5 мең кубометрдан артык су төбендәге утырмалар һәм су үсемлекләре катнашмасын күтәрергә кирәк булачак.

(Казан шәһәре KZN.RU, 7-нче май). Казанда Марьино күле экореабилитациясенең төп этабы старт алды - су төбендәге ләм утырмаларын һәм су үсемлекләренең артык массасын чыгару. Экологлар тәкъдиме буенча, эш зур булмаган экскаватор-амфибия ярдәмендә су өслегеннән үк башкарыла - бу яр территориясенә зыян китермәскә һәм барлыкка килгән экосистеманы бозмаска мөмкинлек бирәчәк.

Күлнең җир сулары белән туенуын һәм суның кислород белән баетылуын булдыру өчен, су үсемлекләренең артык массасыннан арыну һәм күлне тирәнәйтү кирәк. Бу тәкъдимнәр күлнең торышын өйрәнгән вакытта профессор Нәфисә Минһаҗева җитәкчелегендә КФУның Табигатьне төзекләндерү һәм судан файдалану кафедрасы экологлары тарафыннан эшләнде.

Экологлар бәяләвенчә, Марьино күле төбеннән 5 мең кубометрдан артык су төбендәге утырмалар һәм су үсемлекләре катнашмасын күтәрергә кирәк булачак. Күтәрелгән сапропель авыл хуҗалыгы җирләрен ашлау өчен тотылачак - анда туфракның сыйфатын яхшырта торган файдалы химик кушылмаларның һәм микроэлементларның бай комплексы бар.

Тикшеренү мәгълүматлары буенча, хәзер күл күләме 12 мең кубометр су тәшкил итә. Чистартканнан соң, сулыкның күләме 1,5 тапкырга диярлек артачак.

«Күлнең торышы чагыштырмача канәгатьләнерлек, әмма суның аэрациясе, аның хәрәкәте кирәк. Хәзер нәкъ менә экологик яктан кирәкле барлык чаралар комплексы үтәләчәк», - дип билгеләп үтте Нәфисә Минһаҗева.

Исегезгә төшерәбез, Казанның Марьино күле экопаркын экореабилитацияләү проекты март ахырында тәкъдим ителде. Ул күлне тирәнәйтүгә, ярларны ныгытуга, су аэрациясенә һәм яр буе территориясен төзекләндерүгә кагылышлы чараларны күздә тота. Яр буйларында субайларга нигезләнгән күзәтү мәйданчыклары барлыкка киләчәк, шунда ук экопарк флорасы һәм фаунасы турында мәгълүмат стендлары урнаштырылачак. Йөрү юлларының өслеге яңартылачак: өлешчә аны, территориянең нинди булуына карап, терраса тактасына һәм гранит өслегенә алыштырачаклар. Шулай ук яңа декоратив үсемлекләр һәм чәчәк түтәлләре утыртылачак, үрдәкләр өчен йөзмә утрау булдырылачак.

Экореабилитация һәм төзекләндерү өчен кирәкле финанслау күләме 17 млн сум тәшкил итә. Бу акчаларны «СМУ-88» төзелеш компаниясе шәһәр мохитенең сыйфатын яхшырту максатларындаүз хәйрия программасы кысаларында бүлеп бирә.

Шулай ук укыгыз

Барлык яңалыклар