Казанда триатлон буенча Россия беренчелегендә 270 кә якын егет һәм кыз катнашачак

Шуңа бәйле рәвештә 20 нче һәм 21 нче июльдә Һади Такташ урамы буенча хәрәкәт вакытлыча чикләнәчәк.

Фото: Марат Мөгыйнов

(Казан шәһәре KZN.RU, 19 нчы июль). 20 нче һәм 21 нче июльдә Казанның Ишкәкле спорт төрләре үзәгендә егетләр һәм кызлар арасында триатлон буенча Россия беренчелеге узачак. Ярышларда спринт дистанцияләрендә илнең 20 төбәгеннән 270 кә якын яшь спортчы катнашачак.

Ярышларның беренче көнендә ярымфинал һәм финал стартлары узачак. Финалның 1/2 өлешендә спортчыларга ярты чакрымга йөзәргә, 13,5 чакрымга велосипедта узарга һәм 3,5 чакрымга йөгерергә кирәк булачак. Финалда егет-кызларны 300 метрга йөзү, сигез километрга велосипедта йөрү һәм 2 км дистанциягә йөгерү көтә.

Шулай ук бу көнне Балалар лигасының дүртенче этабы кысаларында триатлон буенча республика ярышлары да узачак. Анда 9-12 яшьлек 135 яшь триатлончы катнашачак.

Җиңүчеләрне һәм призерларны бүләкләү 18:00 сәгатьтә булыр дип көтелә.

21 нче июльдә 8:00 сәгатьтә егетләр һәм кызлар арасында эстафеталар узачак. Һәр катнашучыга 250 метр йөзәргә, 3 чакрым велосипедта йөрергә һәм ярты чакрым йөгерергә туры киләчәк. Аннары 11:00 сәгатьтә җиңүчеләрне бүләкләү булачак, дип хәбәр иттеләр шәһәр Башкарма комитетының Физик культура һәм спорт комитетында.

Ярышлар үткәрү сәбәпле 20 нче июльдә 6:00 дән 18:00 гә кадәр һәм 21 нче июльдә 6:00 дән 13:00 гә кадәр Һ.Такташ урамы буенча, Даурия урамыннан Оренбург трактына кадәрге участокта, автомобиль транспорты хәрәкәте чикләнәчәк. Тиешле карар Казан Башкарма комитетында имзаланды. Машина йөртүчеләрдән үз маршрутларын алдан ук планлаштыруны сорыйлар.

Шулай ук укыгыз

Барлык яңалыклар