«Полуторка», патруль мотоцикллары һәм автомобильләре: 1 майда Дәүләт автоинспекциясе тарихы турында күргәзмә ачылды

Килүчеләргә георгий тасмалары, яктылыкны кире кайтаручы тамгалар һәм машиналарга ябыштыргычлар өләштеләр

Бүген Казанда 1 май көнне Казан Дәүләт автоинспекциясе тарихына багышланган күргәзмә ачылды. Экспозициядә «Полуторка» легендар тарихи автомобиле, заманча патруль автомобиле, патруль мотоциклының яңа моделе һәм башкалар тәкъдим ителде.

Шәһәр халкына һәм кунакларына котлаулар белән Россия Эчке эшләр министрлыгының Казан шәһәре буенча идарәсенең Гоcавтоинспекция башлыгы полиция полковнигы Михаил Савин мөрәҗәгать итте.

«Бу май көннәрендә без Бөек Җиңүебезне горурланып искә алабыз һәм фронтовикларга һәм тыл хезмәтчәннәренә рәхмәт белдерәбез. Бөек Ватан сугышы фронтларында 700 меңнән артык татарстанлы көрәшкән, аларның яртысы кире кайтмаслык итеп киткән. Сезне Бөек Ватан сугышында җиңүнең 80 еллыгы белән чын күңелдән котлыйбыз. Ныклы сәламәтлек, бәхет, иминлек һәм иң мөһиме – баш өстендә тыныч күк йөзе телим. Һәм, әлбәттә, имин һәм авариясез юллар», – диде Михаил Савин.

Күргәзмәдә казанлыларга Дәүләт автоинспекциясенең төрле чорларында махсус хезмәт транспорты күрсәтелде. Алар арасында: «Полуторка» Бөек Ватан сугышы чорының легендар автомобиле, ул замансында Ленинград блокадасына азык-төлек алып килгән һәм кешеләрне шәһәрдән алып чыккан, заманча патруль машинасы һәм QJMotor RS 800 патруль мотоциклының яңа моделе. Килүчеләр заманча патруль автомобиле һәм мотоцикл руле артында утыра, «Бранденбург капкасы хуҗабикәсе» тематик фотозонасында истәлекле фотосурәтләр ясый, шулай ук юл-патруль хезмәте җиһазларыннан файдаланырга өйрәнә алды.

Мәйданда шулай ук ЮХИДИ хезмәткәрләре, «Җиңү волонтерлары» иҗтимагый хәрәкәте вәкилләре һәм яшь армиячеләр кунакларга георгия тасмалары, машиналарга ябыштыргычлар һәм яктылык кайтаручы тамгалар тараттылар.

Юл хәрәкәте кагыйдәләре турында «Юл хәрәкәте иминлеге» ДБУнең Казан территориаль идарәсен профилактикалау бүлеге башлыгы Любовь Ананьичева да искәртте.

«Безнең ата-бабаларыбыз имин тормыш өчен көрәшкәнлектән, без аларның өметләрен акларга һәм юл имин булсын өчен барысын да эшләргә тиеш. Хәзер иң актуаль тема – ул индивидуаль мобильлек чаралары, мотоцикллар һәм питбайклар хәрәкәте. Бүген без сезгә белешмәләр тапшырабыз, анда алар белән ничек идарә итәргә икәнлеге турында сөйләнә», – дип шәрехләде вакыйганы Любовь Ананьичева.

Исегезгә төшерәбез, Җиңү көнен бәйрәм итү алдыннан шәһәр урамнарында транспорт чаралары хәрәкәтенә вакытлыча чикләүләр кертелә, шулай ук җәмәгать транспортының эше көчәйтелә. Салют тәмамлангач, җәмәгать транспорты бирүне оештыралар.

Шулай ук укыгыз

Барлык яңалыклар