Зәңгәр күлләрнең ярларын ныгыту буенча эшләр тулысынча тәмамланды

Территориядә җәяүлеләр өчен яңа күпер һәм булачак амфитеатр каркасы барлыкка килде.

Фото: Тышкы төзекләндерү комитеты

(Казан шәһәре KZN.RU, 2 нче ноябрь). Казанда Зәңгәр күлләр ярларын ныгытуны төгәлләделәр. Территорияне төзекләндерүнең беренче этабы кысаларында агач күпер яңартылды һәм тиздән җәүялеләр өчен вак таш һәм карагайдан сукмаклар төзекләндереп бетереләчәк. Шулай ук булачак амфитеатр каркасы әзер, сервис үзәген төзү дәвам итә.

Төзекләндерүнең беренче этабы Бәллүр шарлавыкның терәк диварын, төбен һәм аскы өлешен ныгытудан башланды. Ул күлне Казансу үзәненнән аеручы күчеш булып тора. Аның елга белән кушылуы аркасында Зур Зәңгәр күлне югалту куркынычы булды, чөнки ул секундына 1,6 мең литр чамасы су чыгара иде. Шул сәбәпле экологлар ярларны ныгытырга тәкъдим иткән.

Ярны ныгыту – күп көч таләп итә торган эш. Ул тирә-юньдәге туфракның торышына игътибар таләп итә. Ярларны ныгытуның финал этабында гына белгечләр территорияне төзекләндерүгә кереште.

Белгечләр яшел үсентеләр белән аеруча сак эшлиләр. Аларны участокта сакларга тырыштылар, эшчеләр аварияле агачларны һәм инвазив өрәңгене генә алды. Алга таба каен, зирек, шомырт, өрәңге, тал, спирея һәм башка агачлар утырту планлаштырыла.

Халыкка уңайлы булсын өчен Зәңгәр күлләр территориясен навигация, эскәмияләр, пикник өстәлләре һәм чүп савытлары белән җиһазландырачаклар. Ачык һавада яктырту һәм видео күзәтү иҗтимагый киңлекнең мәҗбүри өлеше булачак.

Төзекләндерү эшләре быел тәмамланачак, ә киләсе елда җитеп бетмәгән элементлар урнаштырылачак, дип хәбәр иттеләр Казан Башкарма комитетының Тышкы төзекләндерү комитетында.

Шулай ук укыгыз

Барлык яңалыклар