Казан полициясе мошенниклыкта шикләнелгән Тула кешесен тоткарлаган

Зыян күрүче җинаятьчедән товар сатып алганда 11 мең сум акчасын югалткан

Фото: Денис Гордийко

(Казан шәһәре KZN.RU, 19 нчы декабрь). Казанда яшәүче хатын-кыз алдакчының хәйләсенә эләгә һәм 11 мең сум акча югалта.

Зыян күрүче интернетта алдау корбаны булуын җиткерде. Ул бушлай игъланнар сайтында автомобиль аккумуляторын сату тәкъдимен таба. Хатын-кыз сатучы белән элемтәгә чыга, килешү шартлары турында сөйләшә һәм билгесез кеше хисабына 11 мең сум күчерә, әмма товарны алмый.

ТР башкаласы полиция хезмәткәрләре алдауда шикләнелгән Тула кешесен тоткарлый. 27 яшьлек егет үз гаебен таныган һәм акчаны кире кайтарган.

«Азино-2» полиция бүлегендә шикләнелүчегә карата РФ Җинаять кодексының 159 нчы маддәсенең 2 нче «Мошенниклык» өлешендә каралган җинаять составы билгеләре буенча җинаять эше кузгатылган. Тикшерү вакытында ир-ат читкә китмәү һәм тиешле тәртип турындагы чикләү чарасы каралган, дип хәбәр иттеләр Россия Эчке эшләр министрлыгының Казан буенча идарәсе матбугат хезмәтендә.

Исегезгә төшерәбез, ел башыннан Казанда 9,5 меңнән артык киберҗинаять теркәлгән – бу хокук бозуларның 47% ы.

Бушлай реклама сайтлары аша акча урлау мошенниклыкның популяр ысулларының берсе булып тора. Товар сатып алганда мошенникларның хәйләләренә эләкмәс өчен, барлык операцияләрне белдерүләр сайтында башкарырга, билгесез сылтамалар буенча күчмәскә кирәк. Мессенджерларда шәхси хат алышмаска һәм товарның үзен карамыйча сатып алмаска кирәк.

Шулай ук укыгыз

Барлык яңалыклар